എന്റെ അമ്മാവൻ 🥰🥰

വായിച്ച ജീവിത പുസ്തക താളിലെ 
ആദ്യ ദളം ഞാൻ മറിച്ചുനോക്കെ 
വാത്സല്യപാലമൃതൂട്ടി വളർത്തിയ 
മാതുലനാർദ്രമായ് നോക്കിയെന്നെ 
നെറ്റിയിൽ നൽകിയ ആയിരം ചുംബനം 
ഒറ്റ നിമിഷത്തിൽ മിന്നി മാഞ്ഞു 
ശിക്ഷയും ശാസനയൊന്നു മേയില്ലാതെ
സൗമ്യമായ് എന്നെ പരിചരിച്ചു
ഓരോ അടിയും പതറാതെ എന്നെയാ
കൈകളിൽ കാത്തു പൊതിഞ്ഞു വെച്ചു
വാത്സല്യം മാത്രം കോരിയൊഴിച്ചു ഉരുട്ടി ഉരുളകൾ തന്നിരുന്നു
കുഞ്ഞിമോളേ എന്ന സ്നേഹ വിളിയോർത്ത്
ഇന്നുമെൻ കണ്ണു നിറഞ്ഞിടുന്നു
ആദ്യാക്ഷരം കുറിച്ചെന്നുടെ പേരു മേ
ചൊന്നതാ മടിയിൽ വെച്ചായിരുന്നു
ദീനമെങ്ങാനുമോ വന്നാലോ ചാരെവന്നോരോ മരുന്നുമെടുത്തുതന്ന്
ഓടിനടന്നെന്നെ പോറ്റുന്നു കാക്കുന്നു
കണ്ണിമ തെല്ലുമേ ചിമ്മിടാതെ
വാക്കിലും നോക്കിലും വറ്റാത്ത വാത്സല്യം വാരിവിതറി വളർത്തിയെന്നെ
എന്നകതാരിൽ ഒളിഞ്ഞു കിടക്കുന്ന വാസനകൾക്ക് വളവുമിട്ട്
പാട്ടു പഠിപ്പിച്ച് ആട്ടം പഠിപ്പിച്ച്
ജ്യോതിഷ വിത്തിനു വെള്ളം തേവി
കൈ പിടിച്ചെന്നെ നടത്തിയ വീഥികൾ
ഓർമ്മയിൽ ആർദ്ര കണങ്ങളായി
അന്നു തൊട്ടിന്നോളം എൻ മനതാരില്
അച്ഛനുമമ്മയും ഈയൊരാള്
ദൃശ്യമായാകൈകൾ ദൂരെ മറഞ്ഞാലും
അദൃശ്യമായ് ആ കരം എന്റെ കൂടെ
എല്ലാരുo ചൊല്ലുന്നു അമ്മ തൻ മാഹാത്മ്യം
ഏറ്റുചൊല്ലീടുന്നു അച്ഛനെ ബാക്കി പേർ
എന്നാലെനിക്കന്യമാം ആ സ്നേഹ മാധുര്യം
തന്നോരമ്മാവൻ തന്നെയെൻ ദൈവം
                           Written by
                            ശ്രീജ ടി പി