ହୃଦୟର କଥା କହିଦେଲି
ହୃଦୟର କଥା କହିଦେଲି
ମୋ ମନର ସେଇ ନିରୁତା ପ୍ରେମକୁ
ସାଇତି ରଖିଛି ତୁମରି ପାଇଁ
ନିଃଶଦ୍ଦ ରାତିରେ ଆସିଲେ ଗୋ ସାଥୀ
ଅଭିସାରେ ଆମେ ଦେବା ବିତାଇ ।
ଜହ୍ନ ହସୁଥିବ ବାଦଲ ଫାଙ୍କରେ
ତାରା ରହିଥିବ କଣେଇ ଚାହିଁ
ତୁମ ଅଧରରେ ମୋ ଅଧର ଯୋଡି
ପ୍ରେମର ମଦିରା ଯିବା ଗୋ ପିଇ ।
ରାତ୍ରି ଗଡୁଥିବ ପ୍ରେମ ବଢୁଥିବ
ଆମେ ଥିବା ଗୋ ଏକାଠି ହୋଇ
ଏଇ ଜନ୍ମ ନୁହେଁ ଜନ୍ମ ଜନ୍ମ ପାଇଁ
ଜନ୍ମ ନେବା ଆମେ ସାଥୀ ଯେ ହୋଇ ।
ସମୟକୁ ଆମେ ସାମନା କରିବା
ସେ ଆସୁ ପଛେ ଯେଉଁ ଭାବେ
ସୁଖରେ ଅଧିର ଦୁଃଖରେ କାତର
ହେବାନି ଗୋ ସାଥୀ କେବେ ।
ରାହା ହେବା ପାଇଁ ନାହିଁ କେହି ସାଥୀ
ଆମ ଜୀବନ ଅମଡା ପଥେ
ପରସ୍ପର ଆମେ ଭରସାଟେ ହୋଇ
ଚାଲୁଥିବା ସାଥେ ସାଥେ ।
ଥକି ଗଲେ ପାଦ ବସି ଯିବା ସାଥୀ
ହାତ ଧରା ଧରି ହୋଇ
ତୁମରି ବକ୍ଷରେ ମୁଣ୍ଡ ରଖି ସାଥୀ
ମୁଁ ଶାନ୍ତିରେ ଯିବି ଗୋ ଶୋଇ ।
ତୁମେ ଖାଲି ମୋର ସାଥୀଟିଏ ନୁହେଁ
ମୋ ଭାବନାର ଶେଷ ନାମ
ତୁମେ ଖାଲି ନୁହଁ ପ୍ରଥମ ପ୍ରେମ ମୋ
ମୋ ଜୀବନ ଶେଷ ପ୍ରେମ ।