अजूनही बरसात आहे...

पहिल्या वहिल्या पावसाचा

मृदगंध दरवळतो तनात,

हिरवीगार होते धरणी

कुरण हिरवे दाटते मनात ...१

दाटून मेघ मग हलकेच

कोसळतो धरणीवर गारवा,

रोमांचीत करणाऱ्या धारांत

मनी भरतो ओला हर्ष नवा ...२

आपण काही मागायच्या आधी

पाऊस खूप काही घेऊन येतो,

आपल्याला जे हवे जेव्हडे हवे 

पाऊस भरभरून देऊन जातो ...३

ढगांचा होतो गडगडाट 

आणि विजांचा कडकडाट,

बरसणाऱ्या धारांमध्ये 

मधूनच दिसते ओली पायवाट ...४

त्या गडद काळ्या अंधारात 

मेघराजा अखंड बरसत राहे ,

संपली जरी वादळवेडी रात 

तरी अजूनही बरसात आहे ...५