ಕನ್ನಡ ವರ್ಣಮಾಲೆ ಪದ

ಕನ್ನಡ ವರ್ಣಮಾಲೆ ಪದವ

ಹಾಡುತ ಕುಣಿಯೋಣ ಬನ್ನಿ II

ಅವರಿವರೇನೇ ಹೇಳಲಿ

ಆತ್ಮವಿಶ್ವಾಸ ಕುಂದದಿರಲಿ

ಇರಲಿ ಶುದ್ಧಮಾರ್ಗವು ನಿನಗೆ

ಈಸಲು ಸಿದ್ಧನಿರಬೇಕು

ಉದರದ ನೆನಪಿನ ಜೊತೆಗೆ

ಊರಿನ ಅರಿವಿರಬೇಕು

ಋಣಾತ್ಮಕ ತೆಗೆದಿಡಬೇಕು

ಎಲ್ಲರೂ ಸಮಾನರಾಗಿದ್ದು

ಏರಿಕೆ ಉನ್ನತ್ತವಿರಬೇಕು

ಐಸರಾಮಿ ಬರದಿರಲಿ ನಿನ್ನ

ಒಲವಿನ ಬದುಕಿನಲೀ

ಓದಿನ ಮಹತ್ವದರಿವಿನ ಜೊತೆಗೆ

ಔನ್ನತ್ಯದ ಚಿಂತನೆಗಳಿರಲಿ

ಅಂತರ್ಯದ ಸೊಗಸಿನ ಜೊತೆಗೆ

ಅಂತಃಕರಣವು ಮೇಳೈಸಲೀ

ಕನ್ನಡತನವ ಬಾಳಲೇಬೇಕು

ಖಡ್ಗಕೆ ಬದಲು ಮೈತ್ರಿಯ ಕೊಟ್ಟು

ಗಣ್ಯತೆ ಗಳಿಸಿರಬೇಕು

ಘನತೆಯ ಬದುಕನು ಕಟ್ಟಲುಬೇಕು

ವಾಙ್ಮಯಿ ಕುಶಲವ ಹೆಚ್ಚುತಲಿ

ಚತುರ ಗಾನವ ಹಾಡಲುಬೇಕು

ಛಲದಲಿ ಸಾಧನೆಗಿಳಿಯಲೇಬೇಕು

ಜನ್ಮದ ಸಮರಸ ತಿಳಿಯುತಾ

ಝರಿಯೋಪಾದಿಯ ಪ್ರಕ್ರಿಯೆಯಲಿ

ಜ್ಞಾನ ದೀಪವ ಹಚ್ಚಲುಬೇಕು

ಟಗರು ನುಗ್ಗುವ ತೆರದಲೀ

ಠರಾವು ಕನ್ನಡಕ್ಕಿರಬೇಕು

ಡಮರುಗ ವಾದ್ಯವ ಮೊಳಗಿಸಿ

ಢಂಬಾಚಾರವ ದೂರ ಮಾಡಿ

ಹಣ ದಾಹವ ಬದಿಗಿರಿಸಿ

ತನುಮನವೆಲ್ಲಾ ನಿರ್ಮಲವಾಗಿ

ಥಟ್ಟನೆ ಕಿರಣವ ಹರಡಿಸಬೇಕು

ದಮನಿತ ಬಾಳಿಗೆ ನೆರವಾಗಿ

ಧನ್ಯತಾ ಭಾವವ ಹೊಂದಲುಬೇಕು

ನಕ್ಷತ್ರವಾಗಿ ಮಿನುಗುತ ನೀನು

ಪದಗಳ ಗುಚ್ಛದಿ ಆಡಲು ಬೇಕು

ಫಲಶ್ರುತಿ ಗಳಿಸಲು ಶ್ರಮಪಡುತಾ

ಬದಲಾವಣೆಯ ಗುರಿಯಿರಬೇಕು

ಭವ್ಯ ಭಾರತದ ಕನಸಿನ ಕಡೆಗೆ

ಮನಸುಗಳು ಒಂದಾಗಲೇಬೇಕು

ಯಶಸ್ವಿ ಬದುಕಿನ ಕಡಲಲಿ

ರವಿಕಿರಣದ ರಂಗಿನ ನಡುವೆ

ಲಕ್ಷಣ ಹುಟ್ಟನು ಹಾಕಲೇಬೇಕು

ವರದಾನದ ಭೂದೇವಿಗೆ ನಮ್ಮನು

ಶತಸಿದ್ಧರಾಗಿ ಅರ್ಪಿಸಬೇಕು

ಷಟ್ಸ್ಥಲ ಕರ್ನಾಟಕ ಸಿದ್ಧಾಂತದಿ

ಸರ್ವರೂ ಸಮಾನವಾಗಿರಬೇಕು

ಹದುಳದೀ ಬಾಳುತಲೆಲ್ಲರೂ

ಹಳದಿ ಕೆಂಪಿನ ಪತಾಕೆಯನ್ನು

ವಿಶ್ವದೆತ್ತರಕೆ ಹಾರಿಸಬೇಕು II