ಜನಸಂಖ್ಯಾ ಸ್ಪೋಟ

ಸ್ಪೋಟಗೊಂಡಿದೆ ಜನಸಂಖ್ಯೆ 

ಮಿತಿಮೀರಿದೆ ಇದರ ಅಂಕಿಸಂಖ್ಯೆ 

ಪ್ರಕೃತಿಯ ಶಿಶುವು ಮಾನವನು 

ಆಕೆಯ ಆರೈಕೆಯಲೇ ಬೆಳೆದಿಹನು 

ವಿಕಸಿತ ಪ್ರಭೇದವಾಗಿಹನು 

ವಿವಿಧ ಮಜಲುಗಳ ಮುಟ್ಟಿಹನು 

ತಣಿಯದ ದಾಹವು ಅರಿವಿನ ಬಗ್ಗೆ 

ಹಾಕುತ ಆಕಾಶಕೆ ಏಣಿ ಅಂತರಿಕ್ಷಕ್ಕೆ ಲಗ್ಗೆ 

ಭುವಿ ಜಲ ವಾಯುವ ಕೆಡಿಸಿಹನು 

ತನ್ನ ದುರಾಸೆಯ ಮೆರೆದಿಹನು 

ಎಲ್ಲವು ಬೇಕು ಎಂಬ ಆಸೆಯಲಿ 

ಕುಲವನೇ ವಿನಾಶಕೆ ದೂಡುತಲಿ 

ತನ್ನವರ ಸಂಖ್ಯೆಯ ಹೆಚ್ಚಿಸುತ 

ತನ್ನಲೇ ಕಂದರ ಸೃಷ್ಟಿಸುತ 

ಒಂದೆಡೆ ಚೆಲ್ಲುತ ಆಹಾರ 

ಇನ್ನೊಂದೆಡೆ ಅಗುಳಿಗೂ ಹಾಹಾಕಾರ 

ಪ್ರಕೃತಿಯ ಮಣಿಸಲು ಹೊರಟಿಹನು 

ತನ್ನ ವಿನಾಶವ ಮರೆತಿಹನು 

ಮನುಜನೇ ಕಾಲವು ಮಿಂಚಿಲ್ಲ 

ದರ್ಪವು ತೋರುವ ಹೊತ್ತಲ್ಲ 

ಪ್ರಕೃತಿಯ ಒಳಿತಲೆ ನಿನ್ನ ಉಳಿವಿಹುದು 

ಅವಳು ಮುನಿದರೆ ಒಡನೆ ಅಳಿವಿಹುದು 

ಬೆಳಗಲಿ ನಿನ್ನಲಿ ಮನುಷ್ಯತ್ವ 

ಅದುವೇ ನಿಜವಾದ ಅಮರತ್ವ