भोजपुरी पारंपरिक होली गीत 6

भोजपुरी पारंपरिक होली गीत 6 - जागा जागा हे महादेव|

जागा जागा हे महादेव, अइले फागुन के महीनवा|

लगावे लोगवा भोला रंगवा अबिरवा|

जागा जागा हे महादेव|

पार्वती जगावे संग कार्तिक गणेश जगावे|

नंदी जगावे जोरी जोरी करवा|

जागा जागा हे महादेव|

ब्रह्मा विष्णु अइले, बिनवा बजावत नारद अइले|

गाई गाई फगुआ नारद थकी गइले गरवा|

जागा जागा हे महादेव|

फू फू फूहकारी भोला नाग देव जगावे|

डम डम बाजत डीम डमरू जी जगावे|

ठाड़े ठाड़े त्रिशूलवा दबावे भोला गोड़वा|

जागा जागा हे महादेव|

जटवा उतरी गंगा भोला गोड़वा पखारे|

चम चम चमकी चन्दा मथवा निहारे|

तबों नहीं जागे भोला, बीते फागुन के महीनवा|

जागा जागा हे महादेव|

हारी थकी देवलोग भांग पिसे लागल|

केहु लिआवे धतूरा, केहु गाँजा लेवे भागल|

सबकर भक्ति देखि, शिव खुल गइले नयनवा|

जागा जागा हे महादेव, अइले फागुन के महीनवा|