ସପନ କରିବା ସାର୍ଥକ
ସପନ କରିବା ସାର୍ଥକ
ସୁଖ ନିଦ୍ରା ହେଲେ ସପନ ଆବେଶେ ଭିନ୍ନ ରାଇଜରେ ବାସ
ନିଦ୍ରାର ବ୍ୟାଘାତ ହେଲେ ଦୁଃସ୍ୱପ୍ନ ମାନେ କରନ୍ତି ପ୍ରବେଶ ।
କିଶୋରୀ କୁମାରୀ ଦେଖେ ତା'ର ସପନର ରାଜକୁମାରକୁ
ପକ୍ଷୀରାଜ ଘୋଡା ଚଢି ଆସୁଅଛି ଉଠାଇ ନେବ ସେ ତାକୁ
କୁମାର ଦେଖଇ ଲାବଣ୍ୟ ପ୍ରତିମା କୋମଳାଙ୍ଗି ସୁନାଗୋରୀ
ପଥ ଚାହିଁ ତା'ର ଅନାଇ ବସିଛି ଅଣିମାଦି ସୁଖଶିରୀ ।
ଜନନେତା ଆମ ଅବ୍ଦୁଲ କଲାମ ସପନର କଲେ ବ୍ୟାଖ୍ୟା
ସପନ ନିଦ୍ରାକୁ ନଭାଙ୍ଗିଲା ଯଦି ସପନେ ନାହିଁ ତା ଆଖ୍ୟା ।
ସପନ ଦେଖିଲେ ସଫଳ କରିବା ପାଇଁ ହୁଅ ହରବର
ବାପୁଜୀ ଦେଖିଲେ ରାମରାଜ୍ୟ ସ୍ୱପ୍ନ ଅସ୍ପୃଶ୍ଯତା ବିପକ୍ଷର ।
କୁଟୀର ଶିଳ୍ପର ପ୍ରସାର ହୋଇବ ପଂଚାୟତ ରାଜ ଦୃଢ
ନିଶା ନିବାରଣ ହୋଇବ ସଫଳ ନ ମରିବେ କୁଢକୁଢ ।
କଲାମଙ୍କ ସ୍ୱପ୍ନ ଭିଜନ ଟ୍ୱେଣ୍ଟି ଟ୍ୱେଣ୍ଟି ଭାରତର ଭବିଷ୍ୟତ
ବିଶ୍ୱଶକ୍ତି ହୋଇ ଉଭା ହେବ ଯଦି ଯୁବଶକ୍ତି ହେଲେ ଶକ୍ତ ।
ବାଜପେୟୀ ଆମ ସ୍ୱପ୍ନ ଦେଖିଥିଲେ ସୁବର୍ଣ୍ଣ ଚତୁର୍ଭୁଜ
ନଦୀ ଯୋଡା ପରି ମହତ ସପନ ହୋଇନାହିଁ ପୂର୍ଣ୍ଣ ଆଜ ।
ଏତେ ସପନକୁ ରାତି କାହିଁ ବୋଲି ଆପ୍ତ ବାକ୍ୟ ଆମ ଅଛି
ସପନରେ ମଜ୍ଜି ରହିଲେ ଆୟୁଷ ସରି ସରି ଯାଉଅଛି ।
ରାବଣଙ୍କ ସ୍ୱପ୍ନ ସରଗେ ନିଶୁଣି ସପନରେ ରହିଗଲା
କୃର କାଳ ଆସି ଝାମ୍ପି ନେଇ ଗଲା ସ୍ୱପ୍ନ ଆଖିରେ ରହିଲା ।
ଯୁବପିଢି ଆମ ସପନ ଦେଖନ୍ତୁ ନିଜ ପାଇଁ ଦେଶ ପାଇଁ
ନିଜେ ଉଚ୍ଚ ହେଲେ ଦେଶ ଆପେଆପେ ଉଚ୍ଚ ହୋଇବ ସାଇଁ ।