Library
କ୍ରମଶଃ ଆଲୋକ ଆଡକୁ ଏବେ
କ୍ରମଶଃ ଆଲୋକ ଆଡକୁ ଏବେ
ସଚିତ୍ର ଅଂଧାର !
ସନ୍ଦିଗ୍ଧ କୋଠରୀ ଭିତରୁ ଶୁଭୁଥିଲା
କାହାର ଏକ କରୁଣ କଣ୍ଠ ସ୍ବର
ଯେଉଁଠି, କୁକୁର ମାନଙ୍କ ଭେରେଣ୍ଡା ରଡିରେ
ବ୍ୟତିବ୍ୟସ୍ତ ହେଉଥିଲା
ଏକ ସରଳ ନିଷ୍କପଟ ଜୀବନ ।
ପାଖ ଖୁଣ୍ଟ ବତୀଟି ବି'
ଲିଭି ଲିଭି ଆସୁଥିଲା ଏତିକି ବେଳକୁ
ପେଚା ମାନଙ୍କ ଥଣ୍ଟରେ
ଆଉ ବାଦୁଡି ଗୁଡିକ ବି
ଗୋଟି ଗୋଟି କରି ଓହ୍ଲାଇ ଆସୁଥିଲେ
ଗାଁ' ମୁଣ୍ଡ ବର ଓହଳରେ ।।
ସବୁକିଛି ଠିକ୍-ଠାକ୍ ଥିଲା
କିଛି ବଦଳି ନଥିଲା ,
ଛାଇ ସଂଗେ ଆଲୁଅର ଲୁଚକାଳି
ଖେଳ ବେଶ୍ ଜମିଥିଲା
ପୂର୍ବାପର ପ୍ରସଙ୍ଗ ସହ ଆଉକିଛି
ଯାହା ଯୋଡି ହେଇଗଲା-
ଜୀବନ- ଜିଜ୍ଞାସା
ଆଶା- ଅଭିଳାଷା
ଓଠ ତଳେ ବହୁଥିବା
ହୃଦୟର ଭାଷା
ଆଉ ଯେତେ ସବୁ -
କଲମ ମୂନରେ ଆଙ୍କିଥିବା
ଜିଜୀବିଷା ଜୀବନର
ନୀଳ ପରିଭାଷା
ମୁଠାଏ ଅଂଧାର ଭିତରେ
ନିଜେ-ନିଜଠାରୁ ମୁକୁଳିବାର
ଏକ ସମ୍ଭାବନା ବା' ଦିଶା ।
ସବୁ ହୁଏ ତୁମ ଆଉ ମିଛ
ଜୀବନ- ଯୌବନ
କ୍ଷୀଣ-ଉଦ୍ଦୀପନ
କାହା ବୀଜ ମନ୍ତ୍ରରେ
ଗୁଂଜରିତ ହେଲା ତନୁମନ
ଅବଶିଷ୍ଟ ଯେତେକ
ଅଲୋଡା ସପନ
ମିଛ-ମାୟା- ମୋହଗ୍ରସ୍ଥ ରୁଗ୍ଣ ମନ
ଧର୍ମଂ- ଶରଣଂ- ଗଛାମୀ ସୁରରେ
ଆଛାଦିତ ହେଲା
ଆଦି ଓ ଅନନ୍ତ
ଜୀବନ- ନିର୍ଯ୍ୟାସ
ସଚରାଚର ଜୀବନ ପ୍ରବାହ
ଏବେ କ୍ରମଶଃ
ଅଂଧାରରୁ ଆଲୋକ ଆଡକୁ ଧାବମାନ
ସମୟର ଗତି ପରିବର୍ତ୍ତନ !!!
ଡଃ ଶିବ ପ୍ରସାଦ ତ୍ରିପାଠୀ
ସ୍ମୃତି ନିଳୟ, ଉଦୟ ନଗର
ଷ୍ଟେସନ ରୋଡ, ବଲାଙ୍ଗୀର (ଓଡିଶା)
