ମହିଳା ଦିବସର ଅନୁଚିନ୍ତା
ମହିଳା ଦିବସର ଅନୁଚିନ୍ତା
ମାଇପୀ ଜାତିର ଉତ୍ଥାନ ପାଇଁକି
ମୋଠାରୁ ଅଧିକ ଭାବିଛି କିଏ
ଏଇ ଦେଖ ତୁମେ ଆସିବା ଦିନଠୁ
କେଡେ ସରାଗରେ ରଖିଛି ପ୍ରିୟେ ।
ଯାହା ଶିଖିଥିଲ ବାପଘରେ ତୁମ
ଏଇଠି କାମରେ ଲାଗିଲା ନାହିଁ
ପ୍ରତିଟି କଥାରେ ବଲବଲ ହୋଇ
ମୋହରି ମୁହଁକୁ ରହିଲ ଚାହିଁ ।
ଥାଉ ବା ନଥାଉ ଆଖିରେ ନଦେଖି
ସରିଲା କହିଲେ ଜାଣି ନଜାଣି
ପକେଟ ଅଣ୍ଡାଳି ଦୋକାନକୁ ଧାଇଁ
ଉଧାର ହେଲେ ବି ଥୋଇଲି ଆଣି ।
କି ପାଠ ପଢିଛ ମାଷ୍ଟରକୁ ଜଣା
କେମିତି ଏଯାଏଁ ଉତ୍ତୀର୍ଣ୍ଣ ହେଲ
ପଚାରିଲେ କିଛି ମୁହଁ ମୋଡି କୁହ
ଏସବୁ ପାଇଁକି ଅଛି କି ବେଳ ।
ଛାତ୍ର ଜୀବନରେ ବହୁତ ଦେଖିଛି
ଶିକ୍ଷକ ଉଦାର ଝିଅଙ୍କୁ ବେଶି
ସାକ୍ଷାତକାରରେ ଚାକିରି ବି ଥୁଆ
ହସି ଦେଲେ ଟିକେ ଫାଇଲ୍ ପେଶି ।
ମୁଖପୁସ୍ତିକାରେ ଯାହା ହେଉ ପଛେ
ନାରୀ ଜଣେ ଯଦି ଦେଇଛି ଲେଖି
ଘଣ୍ଟାଏ ଭିତରେ ଲାଇକ୍ କମେଣ୍ଟ
ଉଛୁଳି ପଡଇ ପାରୁଛି ଦେଖି ।
ନେତ୍ରୀ ସାଜିଗଲେ ମହିଳା ପଛରେ
ଅନୁଗାମୀଙ୍କର ହିସାବ ନାହିଁ
ରାଧା ମାଆଙ୍କର ପଛରେ ବାବାଜୀ
ଗୋଡାନ୍ତି ନାଲିଆ ଅଧର ଚାହିଁ ।
ତଥାପି ଦେଖୁଛି ମହିଳା ପଛୁଆ
ବଦଳିବ କେବେ ଭାଗ୍ୟର ମୋଡ଼
ନାରୀ ନିର୍ଯ୍ୟାତନା ଭାବିଲା ବେଳକୁ
ନାରୀ ହିଁ ଟାଣଇ ନାରୀଙ୍କ ଗୋଡ଼ ।
ପ୍ରସନ୍ନ କୁମାର ମାଦଳା