Best summer trip for children is with a good book! Click & use coupon code SUMM100 for Rs.100 off on StoryMirror children books.
Best summer trip for children is with a good book! Click & use coupon code SUMM100 for Rs.100 off on StoryMirror children books.

Satyajit Rout

Tragedy


5.0  

Satyajit Rout

Tragedy


ମରି ମରି ଆସୁଥିଲା ଆଶା

ମରି ମରି ଆସୁଥିଲା ଆଶା

3 mins 389 3 mins 389

ଆଷାଢ଼ ମାସ । ମୌସୁମୀର ୠତୁ । ଏକ ଲଘୁଚାପ ଫଳରେ ତିନି ଦିନ ହେବ ଝିପିରି ଝିପିରି ବର୍ଷା ଲାଗି ରହିଛି । ବେଳ ବୁଡି ରାତି ହେଲାଣି । ଗାଁ ଚାରି ପାଖେ ଥିବା ନଈ ନାଳ ପୋଖରୀ ସବୁ ବର୍ଷା ପାଣିରେ ଉଛୁଳିଲାଣି । କୋଉ କାଳରୁ ଗାଁ ରେ ବିଜୁଳି ନାହିଁ । କେମିତି କାହା ଘରେ ଡିବିରି ଗୋଟେ ଜୁକୁ ଜୁକୁ ହେଇ ଜଳୁଥାଏ । ଅନେକ ଘର କିଟି କିଟି ଅନ୍ଧାର ଭିତରେ । ସୁନସାନ୍ ରାତି , ମୁହଁକୁ ମୁହଁ ଦିଶୁ ନଥାଏ । ସିଆଡୁ ଗୋଟେ ଚାଳ କୁଡ଼ିଆ ଘରୁ ଶୁଭି ଆସୁଥିଲା ଆକାଶ ବାଣୀ କଟକର ସଂଧ୍ୟା ସମାଚାର । କୁନି ଚୌକିଟିରେ ବସି ରଘୁ ମଉସା ରେଡ଼ିଓକୁ କାନ ଡେ଼ରି ଶୁଣୁଥାଆନ୍ତି । ଗୋଟେ ପୁରୁଣା କାଳିଆ ଖଞ୍ଜା ଘର । ଘରେ ଖାଲି ରଘୁ ମଉସା ଆଉ ତାଙ୍କ ଭାରିଜା ବସନ୍ତ । ଗୋଟିଏ ବୋଲି ପୁଅ ଦିନିଆ କଲିକତାର ଏକ ସୁତା କମ୍ପାନୀରେ କାମ କରେ । ମାସ ପୁରିଲା ପରେ ରଘୁ ମଉସାଙ୍କ ପାଖକୁ ଡାକରେ ଦୁଇ ହଜାର ଲେଖାଏଁ ପଠାଇ ଦିଏ ପୁଅ ଦିନିଆ । ସେଇ ଟଙ୍କାରେ ରଘୁ ମଉସାଙ୍କ ଘର ଦୁଃଖେ ସୁଖେ ଚଳିଯାଏ । ଏଇ ଦିନ କେଇଟା ହେବ ପୁଅର ରଙ୍ଗୀନ ଫୋଟଟେ ମଧ୍ୟସ୍ଥିଙ୍କୁ ଦେଇଦେଇଛନ୍ତି ପୁଅ ପାଇଁ ବୋହୂଟେ ଦେଖିବାକୁ । ଭାରି ସପନ ଦେଖନ୍ତି ୨ ଜଣ, ଗୋଟିଏ ବୋଲି ପୁଅ ଦିନିଆ , ହାତକୁ ଦି ହାତ ହେବ, ଘରକୁ ନୂଆ ବୋହୁଟିଏ ଆସିବ, ନାତି ନାତୁଣୀ ସହ ଘରଟା ପୁରି ଉଠିବ । ମୁକ ପାଲଟି ଯାଇଥିବା ଘରଟା ପୁଣି ହସି ଉଠିବ । ଏପଟେ ରେଡ଼ିଓର ଖବର କାନ ଡେରି ଶୁଣୁ ଶୁଣୁ ହଠାତ୍ ରଘୁ ମଉସା ଚମିକି ପଡ଼ିଲେ । ଖବର ଥିଲା କଲିକତାର ଏକ କମ୍ପାନୀରେ ନିଆଁ ଲାଗି ୫ ଜଣଙ୍କର ଜୀବନ ଚାଲିଯାଇଛି । ଖବରଟି ଶୁଣି ରଘୁ ମଉସାଙ୍କ ମନ ଆଉ ଥୟ ଧରିଲାନି । ଧୀରେ ଧୀରେ ଦୁଇ ଆଖିରେ ଦୁଃଖର ବୁନ୍ଦା ବୁନ୍ଦା ଲୁହସବୁ ଜମାଟ ବାନ୍ଧି ଆସୁଥାଏ । ରାତିଟାରେ କଣ କରିବେ, କାହାକୁ ପଚାରିବେ କଲିକତାରେ ତାଙ୍କ ପୁଅ ଭଲରେ ଅଛି କି ନାହିଁ । ଆକାଶରୁ ଝିପିରି ଝିପିରି ବର୍ଷାର ଧାର କମୁ ନଥାଏ । କିଟି କିଟି ଅନ୍ଧାରର କାଳ ରାତିଟା ସେଦିନ ଝଅଟି ବି ପାହୁ ନଥାଏ, ରଘୁ ମଉସା ବିଛଣାକୁ ଯିବାକୁ ଇଚ୍ଛା କରୁନଥାନ୍ତି, ସେମିତି ଡିବିରି ଗୋଟେ ମିଞ୍ଜି ମିଞ୍ଜି ହେଇ ଜଳୁଥାଏ ରଘୁ ମଉସାଙ୍କ କାଠ ଚୌକି ପାଖେ । ରଘୁ ମଉସା ଚୌକିଟିରେ ବସୁ ବସୁ , ଆଖି ଲଗିଯାଉ ଥାଏ । ଏମିତି ରାତି ପାହି ସକଳା ହୋଇଗଲା । ବସନ୍ତ ମାଉସୀ ରଘୁ ମଉସାଙ୍କୁ ଡାକିବାକୁ ଲାଗେ ।

ଆରେ ଶୁଣୁଛ , ଶୁଣୁଛ ନା ନାଇଁ ।

ତମେ ରାତି ଯାକ ସେଇ ଚୌକିଟାରେ ଶୋଇ ପଡିଥିଲ ନା କଣ । 

ରଘୁ ମଉସା ଆଖି ଦୁଇଟିକୁ ମଳି ମଳି ବସନ୍ତ ମାଉସୀ ଆଡ଼କୁ ଚାହିଁ ଗମ୍ଭୀର ସ୍ୱରରେ କହିଲେ , ନାଁ ମ କିଛି ନୁହେଁ । ଏମିତି କାଲି ରାତିରେ ବସୁ ବସୁ ଆଖିରେ ନିଦ ଲାଗିଯାଇଥିଲା ତ । 

ହଉ ହଉ - ମୁହଁ ହାତ ଧୋଇ ପକାଅ, ମୁଁ ଅଦା ପକାଇ ନାଲି ଚା ଟୋପେ ଚୁଲିରେ ବସୁଉଛି ଝଅଟି ପିଇଦେବ । ଧୀରେ ହୁଁ ଟିଏ ମାରି ରଘୁ ମଉସା ଉତ୍ତର ଦେଲେ । ଏପରି ଏକ ଖବର ବସନ୍ତ ମାଉସିକୁ କହିଲେ ସେ ଜମା ବି ସହି ପାରିବନି , ମନେ ମନେ ନିଷ୍ପତ୍ତି ନେଲେ ବସନ୍ତ ମାଉସୀଙ୍କୁ ଏ କଥା ଜଣେଇବେ ନାହିଁ ବୋଲି, ଇଆଡ଼େ ମନ ଭିତରେ ଦୁଃଖର କଳା ବାଦଲ ଘୋଟି ଆସୁଥାଏ ପୁଅ ଦିନିଆ କଥା ଭାବି । କପେ ଚା'ରୁ ଅଧେ ଚା ପି ବାହାରି ଗଲେ ପଡୋଶୀ ଗାଁ ର ମହାଜନଙ୍କ ଘରକୁ । ମହାଜନଙ୍କ ଘରେ ପୁରୁଣା ଟେଲିଫୋନ ଟେ ଅଛି । ସୁବିଧା ହେବ କମ୍ପାନୀ ନମ୍ବରରେ ଫୋନ ଟିକେ କରି ପୁଅ କଥା ପଚାରିବା ପାଇଁ । ମହାଜନଙ୍କୁ ନମ୍ବରଟି ଦେଇ କହିଲେ, ଆଜ୍ଞା ମହାଜନେ ଏଇ ନମ୍ବର ଟା ଘରୁ ଖଣ୍ଡେ କାଗଜରେ ଲେଖିକି ଆଣିଛି ଫୋନ ଟିକେ କଲ କଲିକତାକୁ । ମହାଜନେ ଟେଲିଫୋନର ନମ୍ବର ବଟମକୁ ଟିପି ଫୋନ କରୁଥାନ୍ତି । ରଘୁ ମଉସା ବ୍ୟାକୁଳ ହୋଇ ଚାହିଁରହିଥାନ୍ତି ପୁଅ ଭଲରେ ଅଛି କି ନାହିଁ ଶୁଣିବାକୁ । କିଛି ସମୟ ପରେ ଫୋନ ଲାଗିଲା , ସିଆଡୁ ହେଲୋ ବୋଲି ଉତ୍ତର ଆସିଲା...

ମହାଜନେ - ଆଜ୍ଞା ଆମେ ଓଡ଼ିଶାରୁ କହୁଛୁ । ଶୁଣିବାକୁ ପାଇଲୁ ଗତ କାଲି ଆପଣଙ୍କ କମ୍ପାନୀରେ ନିଆଁ ଲାଗି ୫ ଜଣଙ୍କ ଜୀବନ ଚାଲିଯାଇଛି । ଆଜ୍ଞା, କହିବେକି ଦୀନବନ୍ଧୁ ଦାସ କେମିତି ଅଛନ୍ତି, ତାଙ୍କର କିଛି ହେଇନି ତ । ସେଠୁ ଉତ୍ତର ଆସିଲା, ନାଁ ଆଜ୍ଞା । 

ଦୀନବନ୍ଧୁଙ୍କର କିଛି ହୋଇନି । ସେ ୫ ଜଣ ଶ୍ରମିକଙ୍କ ଘର ବିହାର ରାଜ୍ୟରେ...। 

ଫୋନ୍ କଟିଗଲା ......

ରଘୁ ମଉସା ସେଇଠି ଖାଲି ଚଟାଣ ଉପରେ ନଥ୍ କିଣି ବସିପଡିଲେ...।

ରଘୁ ମଉସାଙ୍କ ଆଖି ଦୁଇଟି ଲୁହରେ ଛଳ ଛଳ ହୋଇଯାଉଥିଲା , ଘୋଟି ଆସିଥିବା ଦୁଃଖର କଳା ବାଦଲ ସବୁ ଆସ୍ତେ ଆସ୍ତେ ଅପସରି ଯାଉଥିଲା, ପୁଅର ଜିଇଁବା ଖବର ଶୁଣି ରଘୁ ମଉସାଙ୍କ ମରିଯାଇଥିବା ଆଶାଗୁଡିକ ଆଉ ଥରେ ଜନ୍ମନେଉଥିଲା......।


Rate this content
Log in

More oriya story from Satyajit Rout

Similar oriya story from Tragedy