ନମସ୍ତେ ଜଗତ ଜୀବନ
ନମସ୍ତେ ଜଗତ ଜୀବନ
ନମସ୍ତେ ଦେବ ଦିବାକର l
ଦୂର ହୋଇଲା ଅନ୍ଧକାର ll
ନମସ୍ତେ କଶ୍ୟପ ନନ୍ଦନ l
ଲୁପ୍ତ ହୋଇଲେ ତାରାଗଣ ll
ନମସ୍ତେ ଦେବ ଦିନକର l
ଉଦିତେ ଅସ୍ତ ନିଶାକର ll
ନମସ୍ତେ ଦେବ ଛାୟାକାନ୍ତ l
ରଜନୀ ପାହିଲା ପ୍ରଭାତ ll
ପ୍ରାଚୀ ଆକାଶ ନିରିମଳ l
ସୁସ୍ବରେ ରାବନ୍ତି କୋକିଳ ll
ଉଦିତେ ଦିନମଣି ଧୀରେ l
କୀର୍ତ୍ତନ ଵିଭୂଙ୍କ ମନ୍ଦିରେ ll
ନମେ ତୋ ଚରଣେ ଆଦିତ୍ୟ l
ବଧିଲ ପ୍ରଭୁ ଅର୍କ ଦୈତ୍ୟ ll
ନମସ୍ତେ ସୂର୍ଯ୍ୟନାରାୟଣ l
ନମସ୍ତେ ସୃଷ୍ଟିର କାରଣ ll
ନମସ୍ତେ ସପ୍ତାଶ୍ୱ ବାହନ l
ସାରଥୀ ତୋହର ଅରୁଣ ll
ନମସ୍ତେ ପ୍ରଭୋ ଛାୟାପତି l
ଶାମ୍ବ ହୋଇଲେ ଶାପୁ ମୁକ୍ତି ll
ନମସ୍ତେ ପଦ୍ମିନୀ ରମଣ l
ଭ୍ରମରେ କରନ୍ତି ଗୁଞ୍ଜନ ll
କୋଣାରକରେ ତୁହି ପୂଜ୍ୟ l
ନମସ୍ତେ ପ୍ରଭୋ ଗ୍ରହରାଜ ll
ନମସ୍ତେ ହେ ଦେବ ଭାସ୍କର l
ସକଳ ସୃଷ୍ଟିର ଆଧାର ll
ନମସ୍ତେ ଦେବ ବିବସ୍ୱାନ l
ଉଦୟେ ରାତ୍ର ଅବସାନ ll
ତୋହର ଗତି ଅବିଶ୍ରାନ୍ତ l
ବିଶ୍ୱ ଭ୍ରମଣୁ ନୋହୁଁ କ୍ଷାନ୍ତ ll
ତୋ ବଂଶେ ପ୍ରଭୁ ହୋଇଜାତ l
ଧର୍ମ ରଖିଲେ ରଘୁନାଥ ll
ନମଃ ସବିତା ଗ୍ରହପତି l
ବନିତା ତୋହର ତପତି ll
ବରିଲେ ରାଜା ସମ୍ବରଣ l
କୁରୁ ହୋଇଲେ ଉତପନ ll
ନମସ୍ତେ ଜଗତ ଜୀବନ l
ଶୁଭରେ ଯାଉ ଆଜଦିନ ll