ଅତୀତ ଆଉ ଶୀତ

ଶୀତ ଜଡାଇ ଧରୁଥିଲା ମୋତେ

ଅତୀତ ସବୁ ପଛରୁ ଓଟାରି ଧରୁଥିଲେ

ଅକ୍ଟୋପସ ପରି

ବର୍ତ୍ତମାନକୁ ପିଠି କରି

ମୁଁ ଲେଉଟାଣି ପାଦରେ ଫେରୁଥିଲି 

ପଛକୁ.. ପଛକୁ ।

ସ୍ବପ୍ନ ପରି ଦିଶି ଯାଉଥିଲା ମୋ ଗାଆଁ

ବାପାଙ୍କ ଝାଳୁଆ ମୁହଁ

ବୋଉର ସାତ ସିଆଁ ପଣତ

ଭିତର ମିଠା ମହକସୁନାଖିଲ,

ବାସମତୀରେ ଝଲସୁ ଥିବା ଆମ ଧାନ କ୍ଷେତ

ଚାରୁ ଅପାର ଚେନାଏ ହସ ।

ରୂପା ନୂଆବୋଉର ଲାଜ ମିଶା ଚିଠି

" ମଗୁଶିର ଗଲା ଗୋ, ତମବିନା ମନ ଜମା ଲାଗୁ ନାହିଁ ଏଠି "

ପ୍ରିୟତମା ସୀତାରାଣୀ ବଖାଣୁ ଥିଲା ଦୁଃଖ - ଘରେ ବାହା କରିଦେବେ କହିଲେଣି, ତମ ଘରେ ଥରେ ଆମ କଥା କହି ଦେଖ ।

ଶୀତ ଟାଣୁଥିଲା ଆହୁରି ପଛକୁ

ମୁଁ ଅଣନିଃଶ୍ୱାସି ହେଇ ଯାଉଥିଲି ଆହୁରି

ପତ୍ନୀ ଡ଼ାକୁଥିଲେ - ଜଲଦି ଉଠ, ଅଫିସ୍ ବେଳ ହେଲାଣି

ଅତୀତ ଭିତରୁ ମୁଁ ଧଡ୍ କରି ଫେରୁଥିଲି ବର୍ତ୍ତମାନ ଆଡ଼କୁ ।