തേൻമിഠായി

മൂടി പിടിച്ചു കിടക്കുന്ന  ഒരു സ്ഥലം ഒത്ത നടുക്ക് ഒരു വലിയ വീട് അവിടെ പെട്ടന്ന്  ഒരാൾ കണ്ണുകൾ തുറക്കുന്നു. പണ്ട് ഉണ്ടായിരുന്ന വീടും ഇപ്പോഴുള്ള വീടിന്റെ അവസ്ഥയും  അയാൾ ചിന്തിക്കുന്നു .പല ചിത്രങ്ങളും അയാളുടെ മുൻപിലൂടെ കടന്നുപോയി അയാൾ ശ്വാസം ഒന്നു ഉള്ളിലേക്ക് എടുത്ത് വിടുന്നു കുറെ നാളത്തെ ഭാരം ഉള്ളിൽ വച്ചുകൊണ്ടുള്ള ഒരു നിശൃാസം .അയാൾ അയാളുടെ റൂമിൽ നിന്ന് വീടിൻറെ മുൻപിലേക്ക് ചെറിയ നടത്തം വെച്ചുകൊണ്ട് നടന്നു നീങ്ങി .പൊടി പിടിച്ചിരിക്കുന്ന കസേരകളും വർഷങ്ങളായി പെരുമാറ്റം ചെയ്യാതെ കിടക്കുന്ന പരിസരവും . അയാൾ പാതി അടർന്ന തൻറെ കണ്ണാട ചില്ലിലൂടെ മുകളിലേക്ക് നോക്കി തന്റെ ഭാര്യയുടെ ചിത്രത്തിലൂടെ ഒന്ന് കണ്ണോടിച്ചു നേരെ വീടിന്റെ മുൻവശത്തേക്ക് വന്ന് ഒരു കാലൊടിയാറായ കസേരയിൽ വന്ന് ഇരുന്നു. നേരെ കാണുന്ന തെങ്ങിൻ തോപ്പിലേക്ക് മാത്രം നോക്കിക്കൊണ്ട് അയാൾ കണ്ണുകൾ അടച്ചു ഒരു ചെറിയ സ്വപ്നം അയാളുടെ മുൻപിലൂടെ കടന്നുപോയി ചെറുപ്പത്തിലെ ഒരു സംഭവം.

 മമ്മദിന്റെ ബാപ്പയുടെ മിഠായി  കടയിൽ പുതിയതായി വന്ന ഒരു മുഠായി അവൻ ഒരു പേപ്പറിൽ പൊതിഞ്ഞു കൊണ്ടുവന്നു ഒരണ്ണമേ ഉള്ളൂ ആദ്യമായി കണ്ടതുകൊണ്ടാണെന്നറിയില്ല അത് എനിക്ക് ഒരു കൗതുകമായിരുന്നു . ചുവന്ന കളർ ഉള്ള ഒരു സാധനം ചുറ്റിലും ഒലിച്ചു വരുന്ന നീരുമായി ആ കാഴ്ച എന്നെ ആ മിഠായി  കഴിക്കാൻ തോന്നിപ്പിച്ചു നാവിൽ നിന്ന് വെള്ളം ഊറി വന്നു എന്നാൽ അത് മമ്മദ് ഒറ്റയ്ക്ക് തിന്നു  ആർക്കും കൊടുക്കാതെ അന്നുമുതൽ ഉള്ള ആഗ്രഹം ആയിരുന്നു അത് കഴിക്കണമെന്ന്. മനസ്സിൽ കൂടി കയറിയ ആ ചുവന്ന കളർ ഉള്ള മിഠായി  ഒരുവട്ടമെങ്കിലും രുചിക്കണമെന്ന് . എന്നാൽ അന്ന് അത് കടയിൽ പോയി വാങ്ങിക്കുന്നതിന് അമ്മയോട് പൈസ ചോദിക്കാനുള്ള  ധൈര്യം എനിക്ക്  ഇല്ലായിരുന്നു.  ഒരു നേരത്തെ അന്നത്തിന് വേണ്ടി പാടുപെടുന്ന എന്റെ കുടുംബത്തിന്  അത് വലിയ  പൈസ ആയിരുന്നു. നാളുകൾ പിന്നിട്ടു ഒരു ദിവസം ഞങ്ങൾ സ്ഥിരമായി കളിക്കാൻ പോകാറുള്ള ഗ്രൗണ്ടിന്റെ തൊട്ടടുത്ത വീട്ടിൽ നിന്ന് കുട്ടികൾ കളിക്കുന്ന ശബ്ദം കേട്ടു അന്നൊക്കെ അത് വലിയ കൗതുകമായിരുന്നു . കാശുള്ള വീട്ടിലെ കുട്ടികൾ പട്ടം പറപ്പിക്കുന്നതും സൈക്കിൾ ഓടിക്കുന്നതും  ഒക്കെ . ഞങ്ങൾക്ക്  ഞങ്ങടെ  പട്ട വടിയും,  കടലാസ് പന്തും ഓല പീപ്പിയും, ഒക്കെ ആയിരുന്നു ലോകം എന്നാലും അവർ കളിക്കുന്നത് എനിക്കും  കൂട്ടുക്കാർക്കും നോക്കി ഇരിക്കാനെ കഴിഞ്ഞിരുന്നുള്ളൂ . അവർ വലിയ വീട്ടിലെ കുട്ടികളായത് കാരണം അവരോടൊപ്പം ഞങ്ങൾക് കളിക്കാൻ കഴിഞ്ഞിരുന്നില്ല പെട്ടെന്ന് ആ വീട്ടിലെ ചേച്ചി കത്രീന എന്നാണ് പേര്. ഒരു വെളുത്ത, പൂക്കൾ ഉള്ള ചില്ല് പാത്രത്തിൽ കുറച്ച് ചുവന്ന കളർ ഉള്ള  ആ സ്വപ്ന മിഠായി  കൊണ്ടുവന്നു അത് കണ്ടപ്പോൾ തന്നെ ഒരു കഷ്ണം  അവസാനം ബാക്കിയെങ്കിലും വന്നിരുന്നെങ്കിൽ എന്ന് ഞാൻ ചിന്തിച്ചു പട്ടികൾ ഇര തേടി വീടിൻറെ മുമ്പിൽ നിൽക്കുബോൾ എല്ലും കഷ്ണം ഇട്ടുകൊടുക്കിലെ  അതേപോലെ എങ്ങാനും എറിഞ്ഞു തന്നാലോ  എന്ന് വരെ ചിന്തിച്ചു. .അവരെല്ലാവരും അത് എടുത്ത് കഴിക്കുന്നത് കണ്ടുനിൽക്കാനെ ഞങ്ങൾക്ക് കഴിയുമായിരുന്നുള്ളൂ .അവർ വന്നതും കഴിച്ചു തീരുന്നതും ഒക്കെ പെട്ടെന്നായിരുന്നു  ഒരു കഷ്ണം പോലും ബാക്കി ഉണ്ടായിരുന്നില്ല .അത് കഴിഞ്ഞ് ഞാൻ വീട്ടിലേക്ക് തിരിച്ചു പോകുമ്പോൾ തെങ്ങിൻതോപ്പിൽ വച്ച് ഒരു കുട്ടി എന്നെ തടഞ്ഞുനിർത്തി   കത്രീന ചേച്ചിയുടെ മകളാണ് നാട്ടിലെ വലിയ പ്രമാണികളാണ് അവർ. മേരി എന്നാണ് പേര് . അവളുടെ കയ്യിൽ ഒരു കടലാസ് കഷ്ണം ഉണ്ടായിരുന്നു അതിലൊരു  മിഠായിയും. അവൾ അതെനിക്ക് തന്നു എന്താ ഇവിടെ സംഭവിക്കണേ എന്ന മട്ടിൽ ആശ്ചര്യത്തോടെ ഞാനതു വാങ്ങി രുചിച്ചു എന്താ രുചി ബാക്കി ഞാൻ അവൾക്ക് കൊടുത്തു ഇതിൻറെ പേര് തേൻ മിഠായി എന്നാണെന്നും ആദ്യം  പറഞ്ഞുതന്നതും അവളാണ് . വീട്ടിലെത്തിയപ്പോൾ എന്റെ  മനസ്സിൽ തെന്മിട്ടായിയെക്കാളും അവളുടെ മുഖമായിരുന്നു . 

 പെട്ടെന്നൊരു ശബ്ദം ഞാൻ കണ്ണ് തുറന്നു അപ്പോൾ ഒരു കുട്ടി കണ്മുന്നിൽ  വന്നുനിൽക്കുന്നു അവൻ എങ്ങനെ അവിടെ വന്നു എന്നോ എപ്പോ വന്നു എന്നോ ഒന്നും എനിക്ക് അറിയില്ല ഒരു തേന്മുഠായി എന്റെ കയ്യിൽ തന്നിട്ട്  അവൻ ആ തെങ്ങിൻ തോപ്പിലൂടെ ഓടി പോയി . എന്റെ മുഖത്ത് ഒരു പുഞ്ചിരി വിടർന്നു . ഞാൻ ഈ സുവർണ്ണ മുഠായി   ആഗ്രഹിച്ചപോയൊക്കെയും എനിക്കിത് കിട്ടിയിട്ടുണ്ട് . അത് എങ്ങനെയെന്നോ എന്തുകൊണ്ടെന്നോ ഒന്നും എനിക്ക് അറിയില്ല പക്ഷെ ഇത് എന്റെ മേരി തന്നതാണെന്ന് വിശ്വസിക്കാൻ  ആണ് എനിക്കിഷ്ടം.  ഞാൻ ആ മിഠായിലെ ഒരു കഷ്ണം എടുത്ത് അവൾക്ക് നേരെ നീട്ടി അവൾ എന്റെ അടുത്തുണ്ട് എന്ന തോന്നലിൽ...