ഓർമ്മപ്പൂക്കൾ

ഓർമ്മപ്പൂക്കളേ നിങ്ങൾക്കെന്തൊരഴക് എന്തൊരു മിഴിവ് 

നിറംമങ്ങാതെ പരിമളംചോരാതെയെന്നും വിടരുന്നു 

വാടിടാതെ വിരിഞ്ഞു നിൽക്കുന്നുവെന്നും മാനസവാടിയിൽ

ഏതു ദിനകരൻ നിങ്ങളിൽ ഉണർവ്വേകി

ഏതു മഴവില്ല് നിങ്ങളിൽ വർണ്ണങ്ങൾ വാരിവിതറി

ഏതു തൂവൽ നിങ്ങളിൽ മൃദുസ്പർശമേകി

ഏതു മധുപാത്രം നിങ്ങളിൽ തേൻ ചൊരിഞ്ഞു

ഏതു ഗന്ധവാഹകൻ നിങ്ങളിൽ സുഗന്ധംപൂശി

ഏതു വസന്തം നിങ്ങളിൽ ചാരുത പകർന്നു

ഏതു മുരളിക നിങ്ങളിൽ നിർഝരി ഒഴുക്കി

ഏതു തന്ത്രികളാൽ നിങ്ങളെന്നെ വരിഞ്ഞുമുറുക്കുന്നു

ഏതു കാന്തികതരംഗത്താൽ നിങ്ങളെന്നെ മാസ്മരികവലയത്തിലാക്കുന്നു