ତୁମ ଉପକାରୀ ବନ୍ଧୁ
ତୁମ ଉପକାରୀ ବନ୍ଧୁ
ଶୁଣ ମୋର ଭାଇ ଭଉଣୀ
ମୋର କଥାଟି ଶୁଣ,
ତୁମ ଉପକାରୀ ବନ୍ଧୁ ମୁଁ
ମୋର ଅପାର ଗୁଣ l
କାତି କୁରାଢ଼ିକୁ ଦେଖିଲେ
ମୋତେ ମାଡୁଚି ଡର
ଚାଲିବା ଶକତି ମୋ ଠାରେ
ଦେଇ ନାହିଁ ଠାକୁର l
ନୀରିହ ଜୀବ ମୁଁ ଭୟରେ
କାହିଁ ନପାରେ ଚାଲି
ତେଣୁ ମୁଁ ବିନତି କରଇ
ମୋତେ ନ ହାଣ ବୋଲି l
ପରିବେଶ କରେ ସୁରକ୍ଷା
ଦିଏ ମେଘକୁ ଜଳ
ଜୀବ ଜନ୍ତୁ ପେଟ ଭରଇ
ଫଳାଇ ସୁସ୍ଵାଦୁ ଫଳ l
ପ୍ରାଣୀଙ୍କ ଜୀବନ ବଞ୍ଚାଇ
ଦିଏ ଅମଳ ଯାନ
ମହୀର ଉତ୍ତାପ ହରଇ
ବାୟୁ କରଇ ଘନ l
ପରିବେଶ ଶୋଭା ବଢ଼ାଏ
ଡାଲେ ଫୁଟାଇ ଫୁଲ
ପୁଲକ ଆଣଇ ବିଷାଦେ
ମନ ନଥିଲେ ଭଲ l
ନିଦାଘରେ ରବି ପ୍ରକୋପେ
ଅଙ୍ଗୁ ବୋହିଲେ ଝାଳ
ମୋ ଛାଇ ଦିଅଇ ଆଶ୍ରୟ
ତନୁ ଲଭେ ଶୀତଳ l
ମୋ ଶାଖାରେ ବାସ ବାନ୍ଧନ୍ତି
ଯେତେ ବିହଙ୍ଗ କୁଳ
ମୋ ବଂଶ ବିସ୍ତାର କରନ୍ତି
ଖାଇ ମୋ ପକ୍ଵ ଫଳ l
ମୋ ଶରୀର ନେଇ ମାନବ
ଗଢ଼ି ସୁନ୍ଦର୍ ବାସ
ସାଜ ସରଞ୍ଜାମ ଗଢ଼ାଇ
ଗୃହେ କରେ ନିବାସl
ଖାଦ୍ୟକୁ କରଇ ରନ୍ଧନ
କରି ମୋ ତନୁ ଦଗ୍ଧ
ପରଂବ୍ରହ୍ମ କଲେ ନିବାସ
ହୋଇ ମୋ ଠାରେ ମୁଗ୍ଧ l
ପ୍ରାଣୀଙ୍କ ଶରୀର ଆରୋଗ୍ୟ
ପାଇଁ ଯେତେ ଔଷଧ
ଉପଚାର କଲେ ପାଇବ
ମୋର ଉତ୍ତମ ବିଧି l
ଜଗତ କଲ୍ୟାଣ ପାଇଁ କି
ସିନା ଜନମ ମୋର
ମୋତେ ଯତ୍ନ କଲେ ପାଇବ
ଧନୟଶ ଅପାର l