ସନ୍ଧ୍ୟା

ମଧୁସୂଦନ ରାଓ

ଅସ୍ତ ହେଲେ ଦିନମଣି ହେଲା ଦିନ ଶେଷ

ଆସଇ ରଜନୀରାଣୀ ଧରି କଳାବେଶ,

ସନ୍ଧ୍ୟା ହେଲା ସନ୍ଧ୍ୟା ହେଲା ବୋଲି ପକ୍ଷୀଗଣ

ରାବଦେଇ ଯେଝା ବାସେ କରନ୍ତି ଗମନ l

ଧୁଳି ଉଡାଇଣ ଦାଣ୍ଡେ କରି ହମ୍ବା ରଡ଼ି

ଯାଉଛନ୍ତି ଗୋରୁପଲ ଗୋଠୋରୁ ବାହୁଡ଼ି,

ହଳ କାମ ସାରି ଚଷା ମହାଆନନ୍ଦରେ

ନାନା ରଙ୍ଗେ ଗୀତ ଗାଇ ବାହୁଡଇ ଘରେ l

ଚାହୁଁ ଚାହୁଁ ଅନ୍ଧକାର ଘୋଟଇ ଗଗନ

ଆବରଇ ଜଳ ସ୍ଥଳ ପର୍ବତ କାନନ l

ରତ୍ନ ଦୀପାବଳି ପ୍ରାୟେ ତାରା କୋଟି କୋଟି,

ଜଳୁଛନ୍ତି ଆକାଶରେ ହୋଇ ଗୋଟିଗୋଟି l

ଭାଙ୍ଗି ଯାଇଅଛି ଏବେ ଦିବସ ଗହଳ,

ନହିଁ ଆଉ ଏ ଭୁବନେ ଜୀବନ ଚହଳ l

ଦିନ-ଶ୍ରମ ଅନ୍ତେ ବସି ନିଜନିଜ ଘରେ,

ବିଶ୍ରାମ ଲୋଡନ୍ତି ସର୍ବେ ଆକୁଳ ଅନ୍ତରେ l

ଧୀରେ ଆସୁଅଛି ନିଦ୍ରା, ନରନାରୀଗଣ,

ତାହାର ପରଶେ ଏବେ ମୁଦିବେ ନୟନ l