|| मी पावसास घाबरतो||
|| मी पावसास घाबरतो||
मी पावसास घाबरतो, का उगा मनातली भीती|
तो उधळीत येतो वारू, ये गुलाल माती वरती||
उगा घोर जीवाला लावी, त्याचे वेळी-अवेळी येणे|
कधी भर उन्हाचे येणे, मग भिजून सारे जाणे||
का ढगात नव्हते पाणी, की, धुक्यात दिसले नाही|
का जलधार भुईवर येण्या, त्याने टोलच भरला नाही||
का खिशात नव्हता, पैसा, की कर्ज मिळाले नाही|
का मुद्दाम उशिराने येतो, की वाट सापडली नाही||
आता यानेच मला सांगावे, मी शेतात कसे राबावे|
जमवून ढगांचा मेळा, कधी धरणीवर उतरावे||
ज्योतिष संगती होरा, उद्या पाऊस येईल थोडा|
पण भलतेच घडून जाते, जसा नाचत येतो घोडा||
हे असेच सारे घडते, हा भलतीकडेच पडतो|
रणरणत्या उन्हातही, चौखूर असा उधळतो||
मग कधी अवेळी येऊन, गाव वाहुनी नेतो|
त्या रौद्र रुपाला पाहून, मी पावसास घाबरतो||