గిరిధారి

కందములు //

సరసిజలోచను డాహరి

కరుణారసధార చిల్కి కాపాడు ధరన్

బరమాత్మా!యని పిల్చిన

పరుగున దరిచేరి భక్త వరులన్ బ్రోచున్//

క్షేమమొసంగును హరియని

నీమముగా సేవ సల్పి నిష్ఠగ మెలగన్

గామిత వరదుండు జనుల

తామస గుణములను గాల్చి దయతో గాచున్//

'హరిహరి!'నీవే దిక్కని

కరిరాజు పిలువగ వచ్చి కాపాడి వెసన్

మురిపెముగా దరి చేర్చుచు

వరములొసంగు హరి భక్త వరదుండు సుమా!//

నమ్మిన వారిని వీడక

నెమ్మిని జూపు గిరిధారి నెయ్యుడు భువికిన్

సొమ్ములఁ గాచెడి విభుడట

నెమ్మిలి పింఛము ధరించి నిల్చెను ధరలో.//

కావఁగ గోపచయంబును

గోవర్ధనగిరిని పట్టి గోవిందుడు తా 

నా వేలిపైన నిలపగ 

బావనమూర్తిని పొగడిరి భక్తిగ జనులున్ //