गड्या तू शेतकरी
गड्या तू शेतकरी
गड्या तू शेतकरी , कष्टकरी म्हणून जन्मास आलास ...
हाच काय तो तुझा गुन्हा ...तुझ्या नशिबी दुःख दारिद्र्यच
का म्हणून ? थकलो उत्तर शोधून पुनः पुन्हा...
तू जगलास ,मेलास फरक पडणार का कुणा ?
तुझं जीवन म्हणजे जणू टिंगल - टवाळी
कर्जाचा डोंगर, अखंड तुझ्याच भाळी ..
बळीराजा , जगाचा पोशिंदा म्हणून...
टर उडविली त्यांनीच पिढ्यान पिढ्या ...
तुझ्या मालाला भाव नाही , ना अजिबात तुला
मातीत राबून कित्येक पिढ्या बरबाद झाल्या ...
कुठवर सोसणार अन्याय ? कोण त्यांना जाब विचारणार ?
खाणारे तेच अन गाणारेही तेच, हाच खरा पेच
कुंपणानेच शेत खाल्लें दाद मागावी कोणाकडे ?
हे काय अन ते काय , एकाच माळेचे मणी ...
तू बिचारा अडली गाय.. अन काटे खाय
दगडापेक्षा वीट मऊ , आणखी दुसरे काय ?
निसर्गाने साथ सोडली तशी नशिबानेही ...
आम्हीच दिली चावी स्वखुशीने चोरांच्या हाती ...
आता काय बघत बसावे चॅनलवर तमाशा ...
तू कर मारल्यासारखं, मी करतो रडल्यासारखं ....