शिर्षक - हर्षली हिरवळ

नभातून बरसेल

थेंब थेंब पावसाचे ,

धुंद सरींचा श्रावण

छेडील तार शब्दांचे..!!

उन पावसाचा खेळ

करेल श्रावण मास ,

प्रेमाचा वर्षाव करी

श्रावण महिना खास..!!

एक एक थेंब लाज

गाली उमटवी साज ,

तार छेडली पात्याची

सळसळ जशी बाज..!!

उत्तुंग उल्हास रान

बेफाम मोकळे झाले ,

धुंदावल्या त्या दिशाही 

बेधुंदीत चाल चाले..!!

हिरवा शालू नेसून

श्रावण हसत आला ,

फुलले सारे अंगण

येईल गोपाल काला..!!

नभाशी नातं भूमीचे

जोडले घट्ट बंधन ,

आला श्रावण घेवून

सोहळा रक्षाबंधन..!!

गोफ विणली नभात

इंद्रधनू पसरलं ,

सुंदर रूप मोहक

श्रावणात बहरलं..!!

रंग चढला खेळाला

श्रावणातल्या सणांचा ,

दोर जोडून नात्यांची

आला सण श्रावणाचा..!!