હથેળીમાં રણ

તરસ છીપવાનું કોઈ જ ક્યાં કારણ હતું ?

બહુ દૂર નહિ પણ હથેળીમાં જ રણ હતું.

આશાઓ જીવતરની પૂરી કેમ કેમ થાય ?

ઉપચાર અર્થે જ્યાં ગયા ત્યાં મારણ હતું.

હમદર્દીને દિલાસાઓથી ક્યાં સુધી રેડવું ?

તોય એક આશમાં આગળનું વિચરણ હતું.

કઠણાઈનાં કામમાં તકલીફ ન થઇ કદી,

સરળતાથી જીવવું જ સૌથી અસરળ હતું.

વધુ વિશ્વાસે સ્થિતી જ એવી નિર્માણ થઇ,

કે રક્ષા કરતી વાડ જ ચીભડાનું ભક્ષણ હતું.

મોતી માટે મરજીવો થયો દરિયાના પેટમાં,

પાછા વળીને જોયું તો કિનારે જ ઝાકળ હતું.

સત્યની એક કિરણ માટે જન્મોની તરસ ?

ને આમ જુવો તો સૂરજ જેવું આચરણ હતું.

અંતે ધૂળની રજકણ થઈને વંટોળે ચડ્યો,

ને અચાનક પડ્યો જ્યાં તમારું ચરણ હતું.

"પરમ" કર્મનું ફળ કેટલું શુભ ને તત્ક્ષણ !

હવે ક્યાં કોઈ પંથનું "પાગલ" અનુકરણ હતું.