ଗାରୋଉ ଗାରୋଉ ଗାରେଇ ଦେଲି
ଗାରୋଉ ଗାରୋଉ ଗାରେଇ ଦେଲି
![](https://cdn.storymirror.com/static/1pximage.jpeg)
![](https://cdn.storymirror.com/static/1pximage.jpeg)
ଗାରୋଉ ଗାରୋଉ ଗାରେଇ ଦେଲି ମୁଁ
ପୁରିଗଲା ଟିପା ଖାତା
ସାଇତି ସଜାଇ ରଖିଦେଲି ଥାକେ
ସ୍ମୃତି ସବୁ ମନ କଥା ।
ଅଜାଣତେ ଖାତା ହୋଇଲା ନିଖୋଜ
ଖୋଜି ଲୋଡି ପାଇଲିନି
ନେଇ ସନ୍ତର୍ପଣେ ପଢୁଛି ତାହାକୁ
କିଏ ସେ ନଥିଲି ଜାଣି ।
ଅଚାନକ ଦିନେ ଟେବୁଲ ଉପରେ
ଲାଖିଗଲା ଆଖି ମୋର
ଥୁଆ ହୋଇଥିଲା ହଜିଲା ଡାଏରୀ
ଉପରେ ଗୋଲାପ ଲାଲ ।
ବାସୁଥିଲା ଫୁଲ ହୋଇ ମହମହ
ଲାଗିଲା ଖୁସି ଆନନ୍ଦ
ବିଭୋର ମୋ ମନ ମେଲି ସୂକ୍ଷ୍ମ ପକ୍ଷ୍ମ
ନୀଳସ୍ବପ୍ନେ ହେଲା ମଗ୍ନ ।
ଫୁଲରୁ ଫୁଲକୁ ମନ ପ୍ରଜାପତି
ଉଡିବୁଲି ଅବିଶ୍ରାନ୍ତ
ଖୋଜୁଥିଲା ସ୍ମୃତି ମଧୁର ସୁବାସ
ଗାଇ ମନଫୁଲା ଗୀତ ।
ମୋ ଟିପା ଖାତାର ସୁମନ ସୁବାସେ
ଗୋଟାପଣେ ରଙ୍ଗ ବୋଳି
ଗୁଣୁଗୁଣୁ ଶବ୍ଦ ଚିହ୍ନିବାରେ କଣ୍ଠ
କ୍ଷଣିକେ ନୋହିଲା ଡେରି ।
ତୁମେ ନୀଳକଇଁ ପ୍ରୀତି ପାରିଜାତ
ପ୍ରସ୍ଫୁଟିତ ଶତଦଳ
ଆଶାର କିରଣ ଜୀବନ ପ୍ରଶାନ୍ତି
ସାଥୀ ଇହପର କାଳ ।।