स्त्री म्हणजे कोणालाही न कळणारी

कधी अबोल, तर कधी बडबडणारी

स्त्री म्हणजे कोणालाही न कळणारी

कधी बापाची लाडकी राजस लेक

माहेरी काहीच काम न करणारी

उंबरठा ओलांडताच सासरचा

अचानक जबाबदारीने वागणारी

स्त्री म्हणजे कोणालाही न कळणारी

माहेरी उगाचच लटके रूसून बसणारी

सासरी बोचरे शब्दबाणही पचवणारी

आई-बाबांशी बोलताना मात्र

हास्यामागे अश्रूंचा सागर लपवणारी

स्त्री म्हणजे कोणालाही न कळणारी

आजारी असली तरीही काम करणारी

संसारात तीव्र चटक्यांकडे दुर्लक्ष करणारी

नाती सासरची सारी सांभाळणारी

तरीही सासरच्यांसाठी परकीच असणारी

स्त्री म्हणजे कोणालाही न कळणारी

तिलाही हवी असते अशी साथ

तिचे दुःख समजून घेणारी

तनामनांच्या खोल जखमांवर

मायेने हळुवार फुंकर घालणारी

पण तिची व्यथा आहे कोणालाही न कळणारी