संपन्न महाराष्ट्र

सह्याद्रीतील सह्यकड्यांचे मराठमोळे वीर ,

देशरक्षणा प्राणपणाने तळहातावर शीर .        

बाळकडू मातेने दिधले शूर वीरतेचे

बेडर , निधडी छाती करते , निर्दालन शत्रूंचे     (1)

शूर शिवाजी अन् छाव्याची परंपरा योद्धयांची , 

पेशवाईची , रामशास्त्रींची कर्तबगारी साची .

टिळक , गोखले , सावरकर नी बाबू गेनू थोर

भारतमाता मुक्त कराया सोडियले संसार .      (2)

भूमी आमुची मराठमोळी , संगीतकलासक्त

आशा नि लता अन ग. दि. मा. ,

रविवर्मा भक्त .

अभंगातही थोर साधना ज्ञाना , तुकयांची , 

एकनाथी भारुडे नि आर्या मयूरपंतांची .    (3)

फाळके , भालजीं हस्ते , सिनेदालन खुले .

शाहिरीत साबळे , उमपांचा सूर टीपेला चढे .

नाट्यदर्पणी गंधर्वांचा अभिनय शोभतसे .

व्हायोलिनचा सूर जोगांचा रसिकमना भिडतसे .   (4)

लोकधारा महाराष्ट्राची लावणी , गण , गौळण ,

लोकनाट्य नि कथा , गजाली ,

कर्णमधुर कीर्तन .

वारक-यांची परंपरा ही , भक्तिमार्गास लाभली ,

पंढरीच्या विठूरायापायी भावभक्ती

लोटली .    ( 5)

साहित्यगंध दरवळे येथला अवघ्या विश्वात .

बहिणाबाई , शांताबाई ,पु . ल .

वा रा कांत .

स्त्रियाही प्रगतीपथावर , राष्ट्रपतीपद भूषविले 

फुले नि कर्वे दांपत्यांनी ज्ञानामृत दिधले .      (6)

मराठमोळे पाऊल पुढे कुस्ती , कबड्डीमधी

गावसकर , तेंडुलकर गाजले अवघ्या विश्वामधी .

जलतरण , नेमबाजीमधी महिला यश मिळविती ,

क्रिकेट , गिर्यारोहणामधी त्यांना दिगंत कीर्ती .     (7)

शेती हाच बाणा ठेवुनी बळीराजा राबतसे , 

नवनवीन तंत्रज्ञानाने प्रगतीशील होतसे ,

खाद्यसंस्कृती विपुल इथली परदेशी संतुष्ट , 

पुरणपोळी नि मोदकांकडे होती आकृष्ट .   (8)

थोर , धुरंधर सेनानी स्वातंत्र्यलढा लढले

आगरकर , अत्र्यांनी पेटते टीकास्त्र सोडले .

तैलबुद्धीचे महाराष्ट्रीय नाठाळांस असे काठी ,

हेकट तसेच मधुरही भल्यांस देती लंगोटी .    (9)

विज्ञानातही पाऊल पुढचे नारळीकर , माशेलकरांचे

सावरकर नि आंबेडकर हे हिरेच शिरपेचाचे .

प्रगतीशील महाराष्ट्र तंत्रज्ञानातही अग्रेसर ,

गर्जतो कीर्तीचा डंका परदेशी दूरवर .     (10)

पुनीत भूमीत जन्म लाभणे पूर्वसंचित आपुले ,

पुनर्जन्मही माय मराठीत , परमेशा प्रार्थिले .

महाराष्ट्राची महती माझ्या असे शब्दातीत ,

अल्पमती मी केला यत्न काव्यबंधनात .   (11)