साद
साद
1 min
144
साद तुमची येता सख्यांनो
मन मोहरे अंतर्मन झुले
वर्षे लोटली आता कितीक
मन अधीर भेटण्या झाले
रहाटगाडगे नित्याचेच
बंध तोडूनी मन मोकळे
बालपणीच्या आठवणींचे
मधु गुंजन रंगेल आगळे
भातुकली अन् लपंडाव
मजा त्याची उसळते मनी
पत्ते कँरम ल्युडो सापशिडी
हार कधी नच मन मानी
नवे डाव मांडुनिया आता
तशीच करुया मजा सारी
सारुनिया पडदे वयाचे
लटके भांडू वळणावरी
अधीर मन्मन होई सख्यांनो
भेटू कधी आपण उराउरी
स्वर्गही लाजेल लवुनिया
भेट आपुली होईल न्यारी