रंगरंगीली दुनिया

आयुष्याचा कँनव्हास

रंग विविध रेखावे

देतो निसर्ग कुंचला

रंग तयाने भरावे

रंग केशरी बाल्याचा

अवखळ खळखळ

खेळ खाऊ गप्पागोष्टी

मिळे आनंद निखळ

रंग गुलाबी यौवन

जडे प्रेम कुणावरी

आणाभाका नि वचने

 जीव जडे उराउरी

पीत रंग मध्यमात

गाडी स्थिरावे थोडीशी

लग्न संसारात मग्न

नसे उसंत जीवासी

निवृत्तीचे वळणास

गाडी लागता मनासी

जुने बंध सोडताना

नकळत ये उदासी

येता कांचनसंध्येत

राग लोभ जाती दूर

रंग शुभ्र पैलतीर

मनी आठवांचे पूर

रंग जीवनाचे असे

पालवती सुरांपरि

सुखी आनंदी रहावे

मर्म जाणावे अंतरी