रम्य ती वसुंधरा
रम्य ती वसुंधरा
वसुंधरा नटली हिरव्या शालूने
डोंगरांनी ओढली चादर धुक्याची
दुधाळ झरे डोंगरांवरून धावती
तुडवित वळणाची वाट घाटाची
हिरवे हिरवेगार गालिचे
आच्छादले साऱ्या धरणीवर
ढवळ्या पवळ्या संगे भूमीपुत्र
नांगरणीकरता राबतो शेतावर
आया बाया मिळुनी कामास जुंपली
भात पेरणीच्या पाऊलभर पाण्यात
ओहळावरचा साकव जोडून देतो
आजू बाजुच्या लोकास दोन गावात
तुषार पाण्याचे उधळीत दुधाळ झरे
डोंगरमाथ्यावरुनी उड्या मारती
इकडून तिकडून मिळून सारे ते
मोठ्या नदीच्या पाण्याला मिळती
उंच डोंगरावरुनी लहान मोठे
दूध पाण्याचे धबधबे कोसळती
रांगा त्या धबधब्यांची पाहुनी
मनात माझ्या ते मोर नाचती