मन्मन व्यक्त - अव्यक्त

अंबरी विहरते स्वच्छंद

मम प्रतिभा ही स्वैरमुक्त

लडी रेशमी काव्यगंधित

कधी मुक्तछंद , कधी छंदयुक्त

हिरव्या रानी , हिरव्या वेली

काव्य-शलाका बहरे मनी

मन आनंदी मुक्तनर्तनी

शब्द गुंफिते काव्यबंधनी

फुलपाखरांची भिरभिर

स्वच्छंद नर्तन वा-यावर

मनीची प्रतिभा नवथर

उतरे कविता पानावर

कधीकधी रुसते प्रतिभा

अंतरी हो कालवाकालव

थरचि साचति अव्यक्तांचे

काहूरांचे हो मनी तांडव

व्यक्त - अव्यक्ताच्या आवर्तात

कचाट्यात मन बापुडेचि

बाह्यावर्तने निर्णयाप्रत

राहू मी व्यक्त की अव्यक्तचि