अजून सारे तसेच आहे

मंद धुंद हे वारे वाहती

मनात माझ्या सुगंध आहे

मोरपिशी ते प्रेम मनाचे

अजून सारे तसेच आहे

होता स्पर्श तलम रेशीमी

मनी काहूर अधीर आहे

भेट तुझी अन माझी व्हावी

अजून सारे तसेच आहे

उंच डोंगरी माळावरती

रेशीम गाठी बांधून आहे

किती घेतल्या त्या आणाभाका

वचन सारे तसेच आहे

नदीकिनारी झाडावरती

नाव तुझे अन माझे आहे

बहर फुलांचा मळ्यातला

अजून सारे तसेच आहे

वाट पाहुनी शिणले डोळे

मनात माझ्या छबीच आहे

विरह मनाचा नको आता

मनात माझ्या झुरत आहे