કેમ ચાલશે !

પ્રેમનો પાક લેવો હોય તો વાવ લાગણીઓ સરખેથી,

દિલને જ જો તું રણ કરીશ તો કેમ ચાલશે !

સપનાઓમાં મળવું હોય તો ઊંઘ લે હરખેથી,

આખી રાત જાગરણ કરીશ તો કેમ ચાલશે !

છોડી ગયા છે જે તેને છોડ ને હવે,

એનું જ તું સંભારણ કરીશ તો કેમ ચાલશે !

સરિતા છે એને બસ તું વહેવા દે,

તું સાગર એનું અનુકરણ કરીશ તો કેમ ચાલશે !

મધુમેહની બીમારી છે દુનિયાને,

તું વધુ ગળપણ કરીશ તો કેમ ચાલશે !

જાણીતાઓથી જ છેતરાય છે અહીં લોકો,

ને તું અજાણ્યાથી સગપણ કરીશ તો કેમ ચાલશે !

શાણી છે દુનિયા આખી સમજી લે,

નકામું ડહાપણ કરીશ તો કેમ ચાલશે !

એક-બે વાળ સફેદ થયા એટલામાં,

આખી સ્થિતિને ઘડપણ કહીશ તો કેમ ચાલશે ! 

લખ્યું જ હોય છે હર એક 'દીપ' ને ઓલવાવાનું નસીબમાં,

નકામી આડશ આપવાની મથામણ કરીશ તો કેમ ચાલશે !

'લાચાર' કોણ નથી આ દુનિયામાં અત્યારે ?

એમ જ પરિસ્થિતિને અકળામણ કહીશ તો કેમ ચાલશે !