वाटतं काहीतरी..!

गुणगान भरपूर झालं

उदो उदो पण भरपूर झाला

दिवस वर्षातला एक

मोठ्या थाटात पार पडला

आवळ्याचा भोपळा

की भोपळ्याचा आवळा

देवच जाणे

पण सुशिक्षित आणि

सुसंस्कारित याचा

प्रश्न मनास पडला

शिकले सवरले

स्वतःच्या पायावर

उभे राहिले पण

दुसऱ्या साठी

पाय नाही जाहले

तर काय उपयोग..?

मी माझं माझ्यातून

बाहेर पडता आले नाही

तर काय उपयोग...?

कुसळ पाहुन जन्म सरला

मुसळ नाही दिसले तर

काय उपयोग...?

प्रकाश पाडला पण

बुड अंधारात असेल

तर काय उपयोग...?

माया ममता

गौरविली पण

आप्त पोरके असतील

तर काय उपयोग...?

भाग्य खुलले फुलले

पण सौभाग्य न उमजले

तर काय उपयोग...?

वाचले लिहिले

सांगितले प्रकाशित केले

पण अमलात आणता आले नाही

तर काय उपयोग..!

गीता वाचली पठण केली

सांगितली आणि पारायण केली

पण गीता जगलो नाही

तर काय उपयोग...?

स्वार्थ निस्वार्थ ,स्वातंत्र्य पारतंत्र्य

आचार स्वैराचार यातला फरक नाही कळला

तर काय उपयोग...?

शिकलो सवरलो मोठे झालो

पण लहानात लहान होता आले नाही

तर काय उपयोग...?

गगनास गवसणी घातली

उत्तुंग यश संपादले पण

जमिनीवर पाय नसतील

तर काय उपयोग...!

माणूस बनण्याच्या नादात

माणसातून बाजूला झालो

तर काय उपयोग...?

माणसात रहाताना

माणूस होता आले नाही

तर काय उपयोग...?

प्रश्न भेडसावत असताना

इतके कळले

मी तला मी गेला नाही

तर काय उपयोग ...?