ऋण

सरिवर सर आली

गेली भिजवून चिंब

ओल ओल्यास मिळाली

फुटे बियाण्यास कोंब

रूप पालटले 'भू' चे

साज हिरवळीचा घेता

झटकली मरगळ

मृग नक्षत्रच येता

शालू हिरवा सृष्टीचा

मोद भरे आसमंती

येई फुलून शिवार

गीत पाखरेही गाती

खेळ उन सावलीचा

शेत शिवारी चालतो

रोप 'बाळ' हे तान्हुलं

सुर्यदेव रे जपतो

इंद्रधनू हे तोरण

सप्तरंगी आभाळात

उभारले उंचावरी

स्वागतास दिमाखात

येता सरीवर सर

पिक आनंदी डोलते

नाळ घट्टच मातीशी

ऋण देवाचे मानते