ହଗ୍ ଡେ

ସାରା ବିଶ୍ବ କୁ ଯେ ଜାବୁଡ଼ି ଧରିଛି 

  ତାକୁ ଜାବୁଡ଼ିବ କିଏ

କିଏ ସେ ଦେଖିଚି ଆଦି ଅନ୍ତ ତାର

  ନିରାକାର ପରା ସିଏ।।।।

ଗୋଟିଏ ଉପାୟ ତାକୁ ବାନ୍ଧି ବାକୁ

 ଭକ୍ତି ଓ ପ୍ରେମ ଡୋରିରେ

ବାନ୍ଧି ଥିଲା ଦିନେ ଭକତ ସୁଦାମା

ଭକ୍ତିର ଲୁହ ଦି ଧାରେ।।।।

କେତେ ଚେଷ୍ଟା କଲା ମାତା ଯଶୋମତୀ 

 ବାନ୍ଧିବ ଦୁଷ୍ଟ କହ୍ନେଇ

ତା ଅଣ୍ଟାକୁ ହେଲା ଦଉଡ଼ି ନିଅଣ୍ଟ

  ସିଏ ତ ଜଗତ ସାଇଁ।।।

ଭକ୍ତି ପ୍ରେମ ରଜୁ ଲମ୍ବାଇବୁ ଯଦି

  ଧରା ଦେବ ସେ କାଳିଆ

ତା ପ୍ରେମ ଡୋରିରେ ବାନ୍ଧି ହୋଇଯିବୁ

  ସିଏ ଏକା ତୋର ସାହା।।।

ସାରା ବିଶ୍ବ ଆଜି ଅଶାନ୍ତ ବଳୟ

  ପ୍ରଭୁ ଶାନ୍ତି ନିଳୟରେ

ସେଇଠି ସୃଷ୍ଟିକୁ ଜାବୁଡି ଧରିଛି

 ବସି ନୀଳ କନ୍ଦରରେ।।।।

ଅଭାବ ସଂସାରେ ଭାବର ଠାକୁର

 ଏକା ସେଇ ପରମ ବ୍ରହ୍ମ

ଭାବର ଡୋରିରେ ଜାବୁଡ଼ି ଧରିବୁ 

 କାଟିବୁନି ସେ ବନ୍ଧନ।।।