सावित्रीच्या लेकींनो

नवरात्रोत्सव म्हणजे सुख-शांती

मांगल्य-समृद्धीचे भजन;

घरोघरी नवदुर्गांचे मनातील

भक्तीभावाने पूजन

नवरात्रीचे नऊ दिवस

दिसते नवरंगांची उधळण;

श्रद्धेच्या बाजारात नवविचार

नवकल्पनांची बोळवण

सावित्रीच्या स्वप्नांचा

लेकींकडूनच होतोय भंग;

नवरात्रीचे नऊ दिवस

साडीवर येतोय नवा रंग

महिलांनो, रंग उधळण्याचे

दिवस तुम्हांला कोणामुळे दिसले?

दगड-गोटे, शेणा-मातीचे रंग

जिने तुमच्यासाठी सोसले

कुणाला पुजावे? कुणाला भजावे?

हे चिंतनांती महिलांनी ठरवावे;

आपल्या उद्धारकर्त्या सावित्रीचे

आदर्श डोक्यात गिरवावे

संगीतमय गरब्याचा आनंद,

कोणतीतरी देवी अंगात आहे;

ज्ञानगंगेची झाली गटारगंगा

स्त्री-पुरुष समानता रंगात आहे

आई-बहीण-पत्नी-लेक या

नवदुर्गांचे करू या नमन;

पण असभ्य शृंगारिक

धांगडधिंग्याचेही करू शमन