प्रेमभावना

भरारतो हा वारा गार

थरारते ही काया फार

यौवनाने मुसमुसलेली

मुक्त आज मी नार नवार.||धृ||

उंबरठ्यावर तारुण्याच्या

आज पहा मी उभी असे

जिकडे बघते तिकडे मजला

प्रतिबिंब माझे मला दिसे.||१||

सावळाच हा मेघ विचारी

काय तुला ग झाले आज

तारुण्य उसळते ऐकू येते

सागर लाटांची ही गाज.||२||

तुडूंब भरला मेघ जलाने

रिता करी त्यास वारा गार

दाटुन आली प्रेमभावना

सजणासाठी नटली नार.||३||

धावत सुटली सरीता वेगे

तिज ओढ सागर प्रेमाची

तसेच काही भासे मजला

हुरहुर अनामिक ओढीची.||४||

निसर्ग मला गूढ भासतो

श्रावणातल्या बघून सरी

ऊनसावली खेळामधे

भिजण्याची ही मजा खरी.||५||