निसर्गराजा

हिरवाई दाटे, मंद गार वारा

खुललासे इथे, निसर्ग हा सारा ....!! १ !! 

निळाईच्या लाटा, अपार अथांग 

टाकताचि पाय, उमटे तरंग....!! २ !! 

ताड माड वृक्ष, उंच उंच झाडे

नारळ पोफळी, डौलामधे वेडे....!! ३ !!

लाटांवरी लाटा, भरतीची दाटी

चिंब भिजे देह, सुख गळाभेटी....!! ४ !! 

निसर्गाचे दान, दुधाळ सागर 

पाहता लोचनी, भासे नवथर !! ५ !!

बोटीतूनी जाता, सागर कुशीत

वेगवान मन, तुषार शिंपीत....!! ६ !!

उंच आकाशात, विहरू मजेत

निळाई पसरे, अंबर कवेत......!! ७ !! 

सागर अथांग, ठाव घेई दृष्टी 

कातर हृदय, भिरभिर सृष्टी.....!! ८ !!

निसर्ग हा रम्य, डोळ्यांत माईना

परतीची वाट, पाऊल पाहीना......!! ९ !!