जीवन एक रंगमंच
जीवन एक रंगमंच
गर्भ पोसला मातेने उदरी
नऊमासांनी जीवनमंच मिळाला
बाललिला दाखवून जगाला
वाढत बालक हा विकसित झाला
अनुभवांनी घडविला कलाकार
जीवनपट हळूहळू रंगत गेला
प्रसंगानुरुप वर्तन बदलणारा
असा कलाकार बनला अवलिया
सुख दुःखाचे उन्हाळे पावसाळे
अनुभवातून शिकत राहिला
जगात आपली अवीट छबी तो
स्वकर्तृत्वाने निर्मित राहिला
प्रवाहासोबत वाहत राहणे
कधी वाटले सोपे तयाला
प्रवाह विरोधी वर्तन करता
वादळी रुप आले जीवनाला
जीवन एक रंगमंच असा की
निर्माता तयाचा प्रभु परमेश्वर
कलाकार असू आपण सारे
जरी जीव हा असला नश्वर
जन्म मिळाला जेथे जसा ही
घडत जावूया जमेल जिथवर
रंग अंगचा उधळूनी जीवनी
उड्डाण मारुया जमेल तिथवर
रंगमंचावर शोभे न मी एकटा
मला ही हवेत कलाकार सोबती
दीन दुबळे दुःखी दलित जे जगी
मीच बनेन या सर्वांचा सांगाती
हसत हसवत सोडेन हा रंगमंच
जीवन जगण्याची शिकूनी कला
जरी उद्या मी नसेन या रंगमंची
तरी आठवेल जग नक्कीच मला!!!