रंगात रंगू या

पाना फुलांचे बनवुया रंग

रंगात रंगून होवू चला दंग||धृ||

गुलाबांचे रंग किती किती छानं

हिरव्यागार रंगाची झाडाची पानं

पिवळधम्मक झालं झेंडूचं रानं

रंगांनी या रंगवु सर्वांचं अंग.......||१||

केशरी फुल पळस तीन पानी

निळ्या रंगाची गोकर्ण राणी

पानफुल रंगात मिसळू पाणी

रंगासंगे होई द्या सुगंधित अंग.......||२||

कृत्रिम रंगानी होई नुकसान

टाळू असे रंग ठेवू थोडं भान

निसर्ग साक्षात रंगांची खाण

नैसर्गिक रंगाचा करुया संग........||३||

आनंद उधळीत रंगानी यावे

सप्तरंगी रंगात सर्वांनी न्हावे

सर्वांचे जीवन रंगमय व्हावे

ऐक्याच्या रंगाचे खेळुया रंग.........||४||

रंगुया नाचूया गाऊया गाणी

साऱ्यांनी जपून वापरु पाणी

नको पण खूप निसर्ग हानी

निसर्गरक्षण हा बांधूया चंग.......||५||