आठवांचा बहर

आठवांचे मोरपिस

 जेंव्हा स्पर्शते हे मन

स्मृती जागता सोनेरी

 होई रोमांचित तन

आठवांच्या हिंदोळ्यात

मन पाखरु झुलते

मनी गुपीत जपत

कळी गालाची खुलते

कधी कोसळे आभाळ

उभा दुःखाचा डोंगर

घाव खोलवर करी

आठवांचा तो नांगर

भाव हळव्या मनाचा

कधी उफाळून येई

आठवांच्या बहरात

जीव कासावीस होई

आठवांच्या कुंचल्याने

सारे रंगू दे जीवन

 आठवांच्या बहराचे

 जपू सुंदर ते क्षण

छळणाऱ्या आठवणी

त्यांची करु पाठवण

देती जगण्या उभारी

मनी त्यांची साठवण