डोहाळे

भिज पावसानं सारं रान गर्भाया लागलं

उद्या शेतातली पिकं रानी तान्हुली होतील

मंद वारा त्याचा भाऊ कसा झोपाळा देईल

सरी थोरली होऊन गोड अंगाई गाईल

भिज पावसानं सारं...

सारं आभाळ गर्जून बाप आनंदी होईल

काळी माय उन्हामंदी पान्हा मायेचा पाजील

दव न्हावून लेकरं किरण सोनेरी लेतील

रानामंदी पाखरं गाणं प्रितीचं गातील

भिज पावसानं सारं...

मोठी होतील लेकरं कणसं बाळस धरतील

मैना सखी गं बनून भरल्या रानाला छेडील

डोईवरल्या सुर्यालाही लाज गुलाबी येईल

राजा शेतकरी माझा हिरवा संसार पाहिल

भिज पावसानं सारं...