परसा को झाड़

ऋतुराज  बसंत को

आगमन को बेरामा |

पान झळ परसाका

फुल लगत तोरामा ||१||

रंग सेंदरी फुल को

बन  नैसर्गिक  रंग |

करो पंचमी साजरी

तुमी सबकोच संग ||२||

लाल रंग  दिस असो

लगी से झाड़ला आग |

फुल  को  रंग  लगसे

खेल्  से प्रकृति फाग ||३||

दिस आकार फुलको 

जसी मिट्टु की चोच |

मुन नाव  किंशुक बी

आय दुनियाकी सोच ||४||

एक  देठपर ओको

रवसेत   पान  तिन |

मुन  कहावत  भयी

परसाला पान  तिन ||५||

पान की बनावसेत

दोना अना पतराली |

पंगतमा   जेवनकी

बात रव्हसे निराली ||६||

परसाका   अदभुत 

दिव्य औषधीय गुन |

करो प्रकृतीकी रक्षा

भेटे  सबला  सुकून ||७||