વધાવો પંચમ વસંતની

વધાવો પંચમ વસંતની…

 

પવન પમરાટે વાગી પીપૂડી

વન- કોયલે ટહુકે વાત છેડી

મને  જાદુઈ  છડી જડી

વધાવો પંચમ વસંતની

 

શિશિરી ધરા ત્યજે ઠૂંઠવાઈ

વનવેલી  મઢતી અંગડાઈ

લૂંટાવે ઉલ્લાસ વનપરી

વધાવો પંચમ વસંતની

 

વનપર્ણ  ઝૂમે  રતુંબલ લીલાં

છપનાં જ છાનાં હરખે રસીલાં

મદનની મસ્તી જ કામિની

વધાવો  પંચમ  વસંતની

 

ભરચક જ ભાળ્યું ઉરમાં કેસુડું

નજરું  જ મીઠી, કલરવ મધુરું

ભરું અંગે વ્હાલ તાજગી

વધાવો પંચમ વસંતની

 

ભરી ખુશ્બુ ને જોબન છલકતું

મત્ત  મંજરીમાં  કોઈ મલકતું

ઉમંગી, તું  મૌસમ પ્રીતની

વધાવો   પંચમ  વસંતની (૨)

રમેશ પટેલ(આકાશદીપ)