પરમ અનુભૂતિ
પરમ અનુભૂતિ
દિવસ આખો સંકોચાઈને થયો,
સલૂણી એક સાંજ મસ્તાની મોજ,
આ આંખોમાં તમારી જેમ જ,
કોઈ અદ્રશ્ય અંધકારમાં લપાતું રહ્યું.
તડકાને ને ઝાકળને પ્રેમ હોય શકે,
તો જ આ ઝાકળ થાય ગૂમ,
ફૂલો સાથેના વિયોગના સંજોગે,
આ અસ્તિત્વ અમથું કપાતું રહ્યું.
આમતો કોઈજ પ્રયોજન ક્યાં હોય છે,
કદી બાગની ખીલાવટમાં,
બસ આ તો સ્વભાવગત કોઈ,
ફોરમ બની અમથું જ ફેલાતું રહ્યું.
તમોને નીરખ્યા પહેલા એ વાતની,
માની લો બસ ખબર નો'તી,
સદીઓથી વાદળ વાંહે શરમથી,
શશીમાં આ કોણ સંતાતું રહ્યું ?
પ્રથમ વરસાદેજ ખબર પડે કે,
મજબૂરી પણ સુતી હોય છે માટીમાં,
અચાનક જ અમીછાંટણે આ,
ધરતીમાંથી કોણ આમ મહેકતું રહ્યું ?
આ બધું કેમ ક્યાંથી લખાતું રહ્યું,
હજુ સુધી કંઈ ખાસ ખબર નથી,
પણ તપાસમાં ખબર પડી કે,
ખુદ મુજ મહીથી કૈક ઓછું થતું રહ્યું.
મારી આ પલ પલ ની "પરમ"
અનુભૂતિ ને આ બંધ નયન થકી,
કોણ મારા રુદન અને હાસ્યમાં,
આમ "પાગલ" બનીને પ્રગટી રહ્યું ?