પાગલ સંબંધ

તમે નજરઅંદાઝ કરીને નજરમાં ભરી લીધા,

આમ સાવ ખુલ્લેઆમ હૃદયમાં બંધ કરી લીધા.

હવે આ કેદ નજરની નજરને ગમી ગઈ કેવી,

એક બેકસુરને કાળજાની કોટડીમાં બંધ કરી દીધા.

પાદરમાં ભળી હતી બે છાયા એક તરુવર નીચે,

સજા પહેલા જ આપણે સાક્ષીના પ્રબંધ કરી લીધા.

એકબીજાને ગમવાના આ અવસરે આનંદ આનંદ,

જિંદગીભર રોજ તહેવારના અનુબંધ કરી લીધા.

"પરમ"કરાર થયો હવે કેટલા જન્મોનો તમ સંગ,

કદી ન તૂટે કોઈથી એવા "પાગલ" સંબંધ કરી લીધા.