બાંહેધરી
બાંહેધરી
એના ભરોસા ઉપર ભરોસો કરીને જાણે ભૂલ કરી,
અહીં માણસની માણસનેય ક્યાં હોય છે બાંહેધરી !
ભીતરની લાગણીના જોયા નથી કદી અમે તો માપિયા,
આ ભવ્ય ભાવનાનાં ભંડારની ક્યાં હોય છે બાંહેધરી !
આવતી કાલનું શું કામ જોવું સપનું અમથું હમણાં ?
અદ્રશ્ય શ્વાસોની ચાલવાની કદી ક્યાં હોય છે બાંહેધરી !
બસ આ વ્હાલથી વરસતી ક્ષણોમાં પલળી લીધું અમે,
આ આગાહીનાં વરસાદની તો ક્યાં હોય છે બાંહેધરી !
મોકો મળ્યો છે તો આ સ્મિત સ્નેહથી રેલાવી દીધું લ્યો,
ને પછી આ આંસુના સમયની ક્યાં હોય છે બાંહેધરી !
રમત શરૂ કરી છે હારવાના વિશ્વાસે અહીં કબડ્ડીની,
આ જાલિમ જમાના સાથે જીતની ક્યાં હોય છે બાંહેધરી !
"પરમ" પ્રેમ તો થતાં થઈ જાય આપમેળે હર કોઈને,
અંતરના "પાગલ" અહેસાસોની ક્યાં હોય છે બાંહેધરી !