ગુંજન

આંખમાં તારા પ્રેમનું આંજયું અમે અદ્વિતીય અંજન છે,

કેવું ગજબનું બેખુદીનું આ આપણું અનોખું બંધન છે !

ને ખૂબી જ છે એ તારા દર્શનની અનોખી હરવખત,

કેટલું મનમોહક તારા એક ગાલનું હસતું ખંજન છે !

તારૂ ને મારૂં મળવું હવે કયા ભવે થશે એ કોને ખબર,

તારી યાદો થકી જ મારા જખ્મી દિલનું મનોરંજન છે !

આ ખામોશીની કંદરાઓમાં ભટકતી ધડકનોની સદા,

સંભળાય તો સાંભળ તું એ મારૂં જ અરણ્ય રૂદન છે !

હવે તો "પરમ" દર્દની પીર કહેતા શબ્દો પણ થાક્યા,

રાહ જોતા "પાગલ" કાનોમાં સંભળાતું તારૂં જ ગુંજન છે !