વૃક્ષોની સાથે

વૃક્ષોની સંગાથે મારું મનડું કેવું ફૂલે ફળે,

એ વૃક્ષોના આમર આશિષો સૌના દિલમાં રમે રમે,

જીવનની ક્યારીમાં કેવા બાગ બગીચા ખીલે ખીલે,

સૌને મીઠી છાયા દેતા અંતરમાં એ શ્વસે શ્વસે.

રણમાં લીલી વાડી થઈ ને કણકણમાં એ મ્હેકે છે,

ડુંગર કોતર ખેતરમાં એ એકલતામાં મલકે છે.

સૂર્ય ચંદ્રની શોભામાં એ રંગભરીને હરખે છે,

ગીત શબ્દ ને હાવ ભાવમાં તેજ બનીને ચમકે છે.

ઝરણાં, સાગર, સરવરનાં એ સાચે સાચાં ઘર પણ છે,

રાત દિવસનાં હરપલને એ જીવનમાં અજવાળે છે.

પશુ પંખીને માનવને એ નવલું જીવન અર્પે છે,

મન ભરીને હેત એનો વર્ષા થઈ ને વરસે છે.