તારા શરણની વાત
તારા શરણની વાત
1 min
13.5K
એક બે જ જણની વાત છે
ને એક જ ક્ષણની વાત છે
મૃગજળનીયે આશ ગઈ
આંખમાંના રણની વાત છે
હાથમાં હાથનો વિશ્વાસ આ
આત્મ સમર્પણની વાત છે
અપેક્ષાઓ થઈ છે શૂન્ય
હવે તો અર્પણની વાત છે
અંતિમ ક્ષણે શું ફરિયાદ
છેલ્લા તર્પણની વાત છે
જીવન ભરના મૌનમાં જ
બોલતા મરણની વાત છે
મર્યાદાઓ રાખવી જ રહી
સીતાના હરણની વાત છે
અહમ્ શૂન્ય થયું વજૂદ
હવે તારા ચરણની વાત છે
ઝૂકી ગ્યું જો આ મસ્તક
તારા જ શરણની વાત છે
"પરમ" કડવાશ પી ગયો
"પાગલ" ગળપણની વાત છે