તે મા છે
તે મા છે
1 min
6.9K
સતત પ્રેમ ઝરણું ઝરે છે, તે મા છે !
જે મમતાની મૂર્તિ ઘરે છે, તે મા છે !
નથી કોઈ હોતું તમારી તરફમાં,
અને કોઈ ઊભું રહે છે, તે મા છે !
તમારી તરફ આંગળી કોઈ ચીંધે,
અને જેનું હૈયું બળે છે, તે મા છે !
નથી જન્મ આપીને ભૂલી જતી એ,
જીવનભરની ચિંતા કરે છે , તે મા છે !
અણીનાં સમય પર બચાવે છે તમને,
એ આશિષ જેના ફરે છે, તે મા છે !
તમારા તરફની અપેક્ષા વગર પણ,
તમારી પ્રતીક્ષા કરે છે, તે મા છે !
બધે ક્યાંથી પહોંચી શકે એ બિચારો,
અને રૂપ ઈશ્વર ધરે છે, તે મા છે !