ઘેઘૂર
ઘેઘૂર
ઘેઘૂર યાદોના વટવૃક્ષ તળે હવે મહોબ્બત થાક ખાય છે,
એ વરસ્યા નથી છતાંયે અમે ભીંજાયા હોય એવું કૈક થાય છે !
વિહંગો સ્મૃતિ તણાં કંઈ કેટલાયે મચાવીને ચકચાર હવે,
ગીતડાં ગમનાં એ ગમગીન થઈ ગાતા હોય એવું સંભળાય છે !
ડાળ ડાળ પાત પાત અહેસાસ અંતરે એનો જ અનુભૂતિમાં મને,
હવાની હર લહેરમાં એના આગમનની ખબર વરતાય છે !
અંતરના અભરખા પણ ખરી રહ્યા આ પીળા પર્ણોની જેમ હવે,
ને નવી ફૂટતી કૂંપળોમાં વસંત વ્હાલપની ફૂટતી દેખાય છે !
ડૂસકાં ને ડૂમાઓનું સંગીત અટકી બે શ્વાસની વાંસળી વચ્ચે,
દુઃખ કાળજા છેદાવવાનું સહન શક્તિની હદ વટાવી જાય છે !
મૂળમાં ધરબાયેલી "પરમ" વેદનાઓ, ને આ અદ્રશ્ય ઝખ્મો,
તારા એક મિલનની આશમાં મને પલ પલ "પાગલ" કરી જાય છે !